ალექსანდრე მესხი მათემატიკის XIV კონფერენციაზე: წელს გვყავდა რეკორდულად ბევრი მომხსენებელი და მონაწილე მსოფლიოს 30 ქვეყნიდან. ისინი არიან თავიანთი დარგის გამორჩეული სპეციალისტები

წელს გვქონდა მე-14 საერთაშორისო კონფერენცია საქართველოს მათემატიკოსთა კავშირისა, ის მიეძღვნა საქართველოს მათემატიკოსთა კავშირის დაარსებიდან 100 წლისთავს. ეს უკვე მეტყველებს იმაზე, თუ რაოდენ დიდი ტრადიციები გააჩნია ქართულ მათემატიკურ სკოლას, - განაცხადა გადაცემა „დღის ქრონიკაში“ მეცნიერმა, მათემატიკოსმა ალექსანდრე მესხმა.

მისი თქმით, წელს რეკორდულად ბევრი მომხსენებელი და მონაწილე იყო მსოფლიოს 30 ქვეყნიდან.

„ისინი არიან თავიანთი დარგის გამორჩეული სპეციალისტები. გარდა იმისა, რომ მათ წარმოადგინეს თავიანთი მოხსენებები და უახლესი შედეგები მათემატიკის მიმართულებით, ასევე, კონფერენციის საკმაოდ დიდი დრო დაეთმო კომპიუტერული მეცნიერებების მხრიდან მოხსენებებს. უნდა აღინიშნოს, რომ ახალგაზრდები ესწრებოდნენ მრავლად ამ კონფერენციას. მათ ნახეს ის უახლესი შედეგები, რაც კეთდება თანამედროვე მათემატიკისა და მონათესავე მიმართულებების მხრივ. გაეცნენ ამ შედეგებს.

აღსანიშნავია, რომ ბევრი მოხსენება მიეძღვნა მათემატიკის გამოყენებებს, ისეთ მიმართულებებს, როგორიც არის ბიოლოგია, ფიზიკა, მედიცინა.

უნდა აღინიშნოს, რომ კონფერენციაზე მოწვეული გვყავდნენ ასევე ქართველი მათემატიკოსები, რომლებიც მრავალი წელია მოღვაწეობენ საზღვარგარეთ, ევროპისა თუ ამერიკის კონტინენტებზე. ჩვენი ერთ-ერთი მიზანია, რომ ასეთი ჩვენი თანამემამულეები, რომლებიც უკვე მრავალი წელია იმყოფებიან და ნაყოფიერად მოღვაწეობენ საზღვარგარეთ, დავაბრუნოთ, არ მოვწყვიტოთ საქართველოს. მათი გამოცდილება მათ მოახმარონ საქართველოში მომავალ თაობებს. ამ მხრივ ჩვენი ძალისხმევა არ მოაკლდება“, - აღნიშნა ალექსანდრე მესხმა.