„ჯორჯიან მანგანეზის“ ადვოკატი: კომპანიას რა ინტერესი შეიძლება ჰქონდა, რომ ყალბი ხელმოწერები მოეპოვებინა და შემდეგ მიმდგარიყო ისეთი მოსახლის ნაკვეთთან, რომელიც იტყოდა, ხელი არ მომიწერია არაფერზე და არ შეგიშვებთ სამუშაოდ

კომპანიას რა ინტერესი შეიძლება ჰქონდა, რომ ყალბი ხელმოწერები მოეპოვებინა და შემდეგ მიმდგარიყო ისეთი მოსახლეობის ნაკვეთთან სამუშაოდ, რომელიც იტყოდა, მე ხელი არ მომიწერია არაფერზე და არ შეგიშვებთ სამუშაოდ, - განაცხადა „ქრონიკაში“ ჩართვისას „ჯორჯიან მანგანეზის“ ადვოკატმა, გიორგი ყავლაშვილმა.

მან განმარტება გააკეთა შუქრუთის ერთი ჯგუფის მიერ გაკეთებულ განცხადებებზე, რომ კომპანიის მიერ ნაჩვენები თანხა უფრო მეტია, ვიდრე რეალურად მოსახლეობამ ავანსის სახით მიიღო.

„შესაძლოა, ადამიანებმა შეფასებებზე ვიკამათოთ, მაგრამ ფაქტებს ხომ ვერ გავექცევით?! მესამე პირი, ვინც ამ ფაქტებს მოისმენს, ხომ ერთადერთი აზრი გაუჩნდება - ის, რაც იმ ფაქტებშია ასახული.

პირველ რიგში, რომ ხელმოწერები და მემორანდუმი არსებობს. აი, კომპანიას რა ინტერესი შეიძლება ჰქონდა, რომ ყალბი ხელმოწერები მოეპოვებინა და შემდეგ მიმდგარიყო ისეთი მოსახლეობის ნაკვეთთან სამუშაოდ, რომელიც იტყოდა, აი, მე ხელი არ მომიწერია არაფერზე და არ შეგიშვებთ სამუშაოდ!

კომპანიისა და მოსახლეობის შეთანხმების მთელი არსი ის იყო, რომ ურთიერთგაგების საქმიანი ატმოსფერო ჩამოყალიბებულიყო მხარეებს შორის. მაშინ რად უნდოდა მემორანდუმის გაფორმება, პირდაპირ მივიდოდა კომპანია და დაიწყებდა მუშაობას. კიდევ ერთხელ ვამბობ, ეს ფაქტები არსებობს. არსებობს ჩარიცხვის დამადასტურებელი დოკუმენტები, ფინანსური დოკუმენტაცია როგორც კომპანიაში, ასევე საბანკო ამონაწერები. აქედან გამომდინარე, ძალიან ვერიდები ამას რაღაც სახელი დავარქვა, მაგრამ აბსოლუტურად ფაქტებისგან მოწყვეტილი. ისეთი განცხადებაა, როდესაც სხვა აღარაფერი შეგიძლია, რომ თქვა - გაყალბებულია და მე ხელი არ მომიწერია“, - აღნიშნა კომპანიის ადვოკატმა.

მან მოსალოდნელ სამართლებრივ შედეგზეც ისაუბრა, თუ კომპანიასთან მემორანდუმის ხელმომწერები პირობას არ შეასრულებენ.

„ერთ-ერთ მთავარ, არსებით პირობას წარმოადგენდა, მოსახლეობის, ანუ მეორე მხარის მიერ პირობის დარღვევის შემთხვევაში, საავანსოდ გაცემული თანხის უკან დაბრუნება. კომპანიას ამ სამართლებრივი ინსტრუმენტისთვის, სასამართლოსთვის ამ ეტაპზე არ მიუმართავს, თუმცა ამის შესაძლებლობა კომპანიას აქვს. მინდა ამ ეთერით ვისარგებლო და მოვუწოდო იმ ადამიანებს, ვისაც პროტესტი აქვს კომპანიის მიმართ, ზიანის ან სხვა საკითხებში - ძალიან მარტივად შეიძლება ამ საკითხების საგამოძიებო ორგანოში ან სასამართლოში გადატანა და ძალიან მარტივად და ჩქარა მიიღებენ ამაზე პასუხს. თუ ვინმეს თანხა აქვს ან ეს არ მოსწონს, ამისთვის ცივილური გადაწყვეტის გზა არსებობს“, - აღნიშნა გიორგი ყავლაშვილმა.

შუქრუთის აქციის ჯგუფმა რამდენიმე დღეა ჭიათურიდან თბილისში გადმოინაცვლა. მოსახლეობა „ჯორჯიან მანგანეზის“ საქმიანობის შედეგად გარემოსა და საცხოვრებელ სახლებზე მიყენებულ ზიანს აპროტესტებს. ადგილობრივები აღნიშნავენ, რომ კომპანიის მიერ მადნის ღია კარიერული მოპოვების შედეგად, მნიშვნელოვანი ზიანი მიადგა გარემოს, დაზიანდა საცხოვრებელი სახლები, ეკლესია და სასაფლაოები. აქციის მონაწილეებს სურთ, რომ კომპანიამ შეასრულოს ის ვალდებულებები, რომელიც 2021 წლის შეთანხმებით აქვს აღებული. კერძოდ, პროტესტის მონაწილეები მაღაროების მუშაობის გაჩერებასა და კომპენსაციების გაცემას მოითხოვენ.