რელიგიის სააგენტოს დელეგაცია უნგრეთის პარლამენტს ეწვია

რელიგიის საკითხთა სახელმწიფო სააგენტოს დელეგაცია უნგრეთის პარლამენტის იუსტიციის კომიტეტის თავმჯდომარეს, ვეიკეი იმრეს შეხვდა.

რელიგიის საკითხთა სახელმწიფო სააგენტოს თავმჯდომარის, ზაზა ვაშაყმაძის მიერ საქართველოს რელიგიური მდგომარეობისა და რელიგიის პოლიტიკის გაცნობის პასუხად, კომიტეტის თავმჯდომარემ ხაზი გაუსვა ორი ქვეყნის, საქართველოსა და უნგრეთის ისტორიის მსგავსებასა და თანხვედრას ტრადიციული ღირებულებების პატივისცემაში. მისი თქმით, უნგრეთის კულტურა და თვითმყოფადობა ქრისტიანულ ღირებულებებზეა დაფუძნებული და შესაბამისად, მათი მოქმედი კონსტიტუციაც იცავს ქრისტიანულ ღირებულებებს და ოჯახურ ტრადიციებს, რაც ბრიუსელის და ზოგიერთი დასავლეთ ევროპული ქვეყნის მხრიდან გაკიცხვის საგანია. თუმცა, უნგრეთი არ აპირებს ტრადიციული ღირებულებებზე უარის თქმას.
ზაზა ვაშაყმაძემ ისაუბრა საქართველოს ოკუპირებულ ტერიტორიებზე ადამიანის უფლებებისა და რელიგიის თავისუფლების დარღვევებსა და რუსული ოკუპაციური რეჟიმის მიერ ოკუპირებულ ტერიტორიებზე ქართული კვალის წაშლის მცდელობებზე. უნგრეთის პარლამენტის იუსტიციის კომიტეტის თავმჯდომარემ კიდევ ერთხელ დაადასტურა ევროინტეგრაციის გზაზე საქართველოს მიმართ უნგრეთის მხარდაჭერა.

სტრატეგიულ პარტნიორებს შორის საუკეთესო გამოცდილების გაზიარების მიზნით, ვეიკეი რელიგიის სააგენტოს დაჰპირდა „ეკლესიების შესახებ“ უნგრეთის სპეციალური კანონისა და რელიგიურ გაერთიანებებთან დაკავშირებული ნებისმიერი რეგულაციის მიწოდებას და სამართლებრივი აქტების ექსპერტიზის ფარგლებში დახმარებას.

შეხვედრას ესწრებოდა საქართველოს საგანგებო და სრულუფლებიანი ელჩი უნგრეთსა და მონტენეგროში, თამარ ლილუაშვილი, საგანგებო და სრულუფლებიანი ელჩის პირველი მდივანი, თამარ ჩხაიძე, რელიგიის სააგენტოს სამართლებრივი უზრუნველყოფის სამსახურის უფროსი, დავით დავითაშვილი და რელიგიის სააგენტოს იურისტი, ალექსანდრე შეყილაძე.

ინფორმაციას რელიგიის სააგენტოს საზოგადოებასთან ურთიერთობის სამსახური ავრცელებს.