ირაკლი ლექვინაძემ განმარტა, რას გულისხმობს ფაქტი, რომ მსოფლიო ბანკისა და კონკურენციის საერთაშორისო ქსელის მიერ კონკურენციის სააგენტოს გადაწყვეტილებები ფარმაციის სექტორში საუკეთესოდ დასახელდა

საქართველოს კონკურენციის ეროვნული სააგენტოს თავმჯდომარემ ირაკლი ლექვინაძემ „დღის ქრონიკაში“ ვრცლად ისაუბრა იმაზე, რომ მსოფლიო ბანკისა და კონკურენციის საერთაშორისო ქსელის მიერ კონკურენციის სააგენტოს გადაწყვეტილებები ფარმაციის სექტორში საუკეთესოდ დასახელდა.

„კონკურენციის და მომხმარებელთა დაცვის სააგენტოს მიერ მიღებული გადაწყვეტილებები რამდენიმე მიმართულებით და მათ შორის ფარმაციის ქეისი, რომელიც ერთ-ერთი ყველაზე მნიშვნელოვანი გადაწყვეტილება იყო როგორც მონიტორინგის, ასევე მოკვლევის კუთხით, მსოფლიო ბანკის და კონკურენციის საერთაშორისო ქსელის მიერ შეფასდა ორ ნომინაციაში საუკეთესოდ. კონკურენციის საერთაშორისო ქსელი აერთიანებს 160 ქვეყანას, რომელსაც კონკურენციის უწყება და კონკურენციის სამართლის შესაბამისი აღსრულება გააჩნია. აღნიშნული ორგანიზაციის პარტნიორი არის მსოფლიო ბანკი, რომელიც ყოველწლიურად სხვადასხვა ქვეყანაში მიღებულ გადაწყვეტილებებს კონკურენტული გარემოს გაუმჯობესების კუთხით.

ნომინაციაში – კერძო ინვესტიციების, სამუშაო ადგილებისა და მომხმარებლის კეთილდღეობის ზრდისთვის მდგრადი კონკურენტული პროცესის მხარდაჭერა – გაიმარჯვა GCCA-ს ქეისმა, რომელიც ფარმაცევტულ ბაზარზე მონიტორინგის ფარგლებში გაცემული რეკომენდაციების შედეგად განხორციელებულ რეფორმებს, შეთანხმებული ქმედებების გამოვლენის გადაწყვეტილებებს ეხებოდა. კერძოდ, GCCA-ს მიერ ფარმაციის ბაზარზე 13 რეკომენდაცია გაიცა, რის საფუძველზეც საქართველოს მთავრობის და ჯანდაცვის სამინისტროს მიერ განხორციელებული რეფორმების შესაბამისად ქვეყანაში დაინერგა ელექტრონული რეცეპტის სისტემა, ამოქმედდა GMP და GDP სტანდარტი, დაინერგა რეფერენტული ფასი 7000-მდე მედიკამენტზე, შედეგად რიგ მედიკამენტებზე ფასები შემცირდა და პაციენტებმა მნიშვნელოვანი დანაზოგის გაკეთება შეძლეს. 2023 წელს კი GCCA-ს მიერ ოთხი ფარმაცევტული კომპანია 53 მლნ ლარით დაჯარიმდა – სახელმწიფოს მიერ ონკოლოგიური მედიკამენტების შეძენის მიზნით გამოცხადებულ კონკურსებში იდენტური ფასწარმოქმნის დაწესების გამო.

მეორე ნომინაციაში – სახელმწიფო შესყიდვების გაძლიერება და კონკურენციის შემზღუდველი შეთანხმებების აღმოფხვრა საბიუჯეტო ხარჯების დაზოგვის მიზნით, გამარჯვებული ქეისი ეხებოდა GCCA-ს მიერ მიღებულ ერთ-ერთ გადაწყვეტილებას, სადაც მუნიციპალურ ტენდერში ოთხი კომპანიის შეთანხმებული ქმედება გამოვლინდა. კონკურენციის საერთაშორისო ქსელი (ICN) 160-მდე ქვეყნის კონკურენციის და ანტიმონოპოლიურ უწყებას აერთიანებს. 2025 წელს გამართულ საერთაშორისო კონფერენციას ესწრებოდა: 500-მდე დელეგატი, კონკურენციის საერთაშორისო ქსელის წევრები, სხვადასხვა ქვეყნის კონკურენციის უწყებების ხელმძღვანელი პირები, არასამთავრობო ორგანიზაციების წარმომადგენლები და დარგის ექსპერტები“, - აღნიშნა ლექვინაძემ.