კორონავირუსის გამო ჩინეთში დაგეგმილი მძლეოსნობის მსოფლიო ჩემპიონატი გადაიდო

კორონავირუსის გამო ჩინეთში გასამართი მძლეოსნობის მსოფლიო ჩემპიონატი გაურკვეველი ვადით გადაიდო. გამოცემა Athletics Weekly-ის ცნობით, შესაბამისი გადაწყვეტილება სპორტის ამ სახეობის საერთაშორისო ფედერაციამ კომპეტენტურ ორგანოებთან გავლილი კონსულტაციების შემდეგ მიიღო.

ტურნირი ქალაქ ნანკანში 13-15 მარტს უნდა გამართულიყო. როგორც მძლეოსნობის საერთაშორისო ფედერაციის პრეზიდენტი სებასტიან კოე აცხადებს, ევროპისა და მსოფლიოს პირველობებს შორის ორკვირიანი ინტერვალი აუცილებელია, რათა სპორტსმენებმა მომზადება მოასწრონ, ხოლო კონტინენტის ჩემპიონატი პოლონეთში 5-7 მარტსაა დაგეგმილი.

კორონავირუსის გამო ჩინეთში ჩელენჯერის ოთხი საჩოგბურთო ტურნირი და კალათბურთისა და კრივის ოლიმპიადის საკვალიფიკაციო ტურნირები არ ჩატარდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ბოლო მონაცემებით, კორონავირუსმა ჩინეთში 213 ადამიანი იმსხვერპლა. ინფიცირებულთა რაოდენობამ 9690-ს გადააჭარბა, სრულად კი მხოლოდ 171 ადამიანი განიკურნა.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. ვირუსი უკვე დაფიქსირდა ჩინეთის გარეთ: ტაილანდში, აშშ-ში, სინგაპურში, ჰონგ-კონგში, ნეპალში, ავსტრალიაში, ტაივანზე, მალაიზიაში, იაპონიაში, ტიბეტში, საფრანგეთში, სამხრეთ კორეაში, ინდოეთში, ფილიპინებზე, ვიეტნამსა და კანადაში.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთის ხელისუფლებამ პეკინში ახალი წლისადმი მიძღვნილი ღონისძიებები გააუქმა.

ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

ემუქრება თუ არა მსოფლიოს ახალი ეპიდემია, ვრცლად შეგიძლიათ წაიკითხოთ ბმულზე.