არაბთა საიმიროების სასამართლომ ქართველ დეპუტატს 15-წლიანი პატიმრობა მიუსაჯა

რას ალ-კაიმაჰის სასამართლომ, თანხების გაფლანგვისა ბრალდებით, კომპანია RAKIA Georgia-ს ყოფილ დირექტორს და ამჟამად პარლამენტის წევრს "პატრიოტთა ალიანსიდან" გელა მიქაძეს, დაუსწრებლად, 15 წლიანი პატიმრობა შეუფარდა და 12.8 მილიონი დოლარის ჯარიმა დააკისრა. მასთან ერთად 15 წლიანი პატიმრობა და 4.4 მილიონი დოლარის ჯარიმა დააკისრა სასამართლომ გიორგი ჯანაშიასა და მასთან ერთად RAKIA-ს ყოფილ ხელმძღვანელს ხათერ მასადს. ამის შესახებ ინფორმაციას Gulfnews ავრცელებს.

გამოცემის ცნობით, მათ არაბეთის გაერთიანებული საიმიროების საინვესტიციო კომპანია RAKIA-სგან ჯამში 17.2 მილიონი დოლარის თანხა მიითვისეს.

საქმე ეხება 2010-2011 წლებში, ფოთის პორტსა (რომლის მფლობელიც მაშინ RAKIA იყო) და მაშინ ახლადდაარსებულ კომპანია შპს Raystar Trade-ს შორის გაფორმებულ ხელშეკრულებას. დუბაის პროკურატურის ცნობით, შპს Raystar-ის მესაკუთრეები მიქაძე და ჯანაშია იყვნენ და ამის შესახებ ცნობილი მხოლოდ ხათერ მასადისთვის იყო (RAKIA-ს ხელმძღვანელი დუბაიში) ცნობილი.

გამოცემა წერს, რომ 17.2 მილიონი დოლარი შეთანხმების გაფორმების შემდეგ მიქაძისა და ჯანაშიას შვეიცარიულ საბანკო ანგარიშებზე ჩაირიცხა. სწორედ ეს თანხა უნდა დააბრუნონ მათ.

ხათერ მასადს, რომელიც არაბეთის გაერთიანებული საიმიროებიდან 2012 წლის ოქტომბერში გაიქცა, ინტერპოლი ეძებდა. ის ჯედაჰის (საუდის არაბეთი) აეროპორტში დააკავეს. საუდის არაბეთიდან მისი ექსტრადაციის პროცესი არაბეთის გაერთიანებულ საიმიროებში უახლოეს პერიოდში უნდა დასრულდეს. 

რაც შეეხება გელა მიქაძეს, ის 2016 წლის პარლამენტის მოწევევის დეპუტატია საარჩევნო ბლოკ "დავით თარხან-მოურავი, ირმა ინაშვილი - საქართველოს პატრიოტთა ალიანსი, გაერთიანებული ოპოზიციიდან". imedinews-ი მასთან დაკავშირებას შეეცადა, თუმცა მობილური ტელეფონი დეპუტატს გამორთული აქვს. 

2013 წელს ფინანსთა სამინისტროს საგამოძიებო სამსახურმა გელა მიქაძე დიდი ოდენობით თანხის მითვისების ფაქტებზე, შპს „რაკიინ დეველოპმენტის” და შპს ,,რას ალ ხაიმა ინვესტმენტ აუტორიტი ჯორჯიას’’ ყოფილი დირექტორი გელა მიქაძე სისხლის სამართლის პასუხისგებაში მისცეს. გამოძიების ინფორმაციით, გელა მიქაძემ, „რაკიინ დეველოპმენტის” დამფუძნებელი არაბი ინვესტორების თანხმობის გარეშე, მის მიერ რეგისტრირებულ არარეზიდენტ კომანდიტურ საზოგადოება ,,ბესტფორდ დეველოპმენტ ელ-ელ-ფი’’-ზე, სიმბოლურ ფასად, 1 ლარად გადააფორმა  „რაკიინ დეველოპმენტის” 16 940 000 ლარის ღირებულების 8.47%-იანი წილი.