ბოლო 8 წელიწადში რუსეთმა აფხაზეთსა და ცხინვალს 854 116 მილიონი დოლარი გამოუყო

2009 წლიდან დღემდე, რუსეთის ფედერაციამ აფხაზეთის დეფაქტო რესპუბლიკას 616 მილიონი დოლარის ფინანსური დახმარება გაუწია. ეს მაშინ, როდესაც ოკუპირებული აფხაზეთის მთლიანმა შიდა პროდუქტმა 2015 წელს 28.6 მილიონი დოლარი შეადგინა. ამის შესახებ ინფორმაციას BBC-ის რუსულენოვანი გამოცემა ავრცელებს.

BBC-ის ცნობით, მთელი ამ წლების განმავლობაში, რუსული ფული დარღვევებით - არამიზნობრივად დაიხარჯა, თუმცა ამ მიმართულებით გამოძიება არ დაწყებულა და შესაბამისად, არც ვინმეს პასუხისმგებლობის საკითხი დამდგარა.

აგვისტოს ომის 9 წლის თავზე, რუსეთის პრეზიდენტი ვლადიმერ პუტინი აფხაზეთში არაღიარებული ქვეყნის პრეზიდენტ რაულ ხაჯიმბას შეხვდა, "იმ "ქვეყნის ლიდერს", რომელიც გაეროს მხოლოდ სამმა ქვეყანამ (რუსეთი, ნიკარაგუა და ვენესუელა) და ორმა ჯუჯა სახელმწიფომ (ნაურუ და ვანუატუ) აღიარა", - წერს BBC.

"რუსეთი ყოველწლიურად მილიარდებს ხარჯავს იმ რესპუბლიკის განვითარებაზე, რომელსაც საკუთარი ვალუტაც კი არ გააჩნია და რუსული რუბლით სარგებლობს", - დასძენს გამოცემა.

დეფაქტო აფხაზეთის 2009 წლის ბიუჯეტის 50% დამოკიდებული იყო რუსულ ფულზე, რომელსაც რუსეთის ბიუჯეტი მას ორი პუნქტის მიხედვით აძლევს: "სოციალურ-ეკონომიკური განვითარება" და "საბიუჯეტო ინვესტიცია".

2009-2016 წლებში ე.წ. აფხაზეთის მთავრობამ რუსეთისგან 613 900 მილიონი დოლარი, ხოლო დეფაქტო სამხრეთ ოსეთმა 873 500 მილიონი დოლარი მიიღო.

აფხაზეთში გადარიცხული თანხა, ძირითადად, საცხოვრებელი და საჯარო დაწესებულებების გარემონტებაზე, შენობების რეაბილიტაციაზე, საგზაო ინფრასტრუქტურაზე, ჯანდაცვისა და სხვა სოციალური პროექტების განხორციელებაზე დაიხარჯა.

2010 წელს რუსეთის აუდიტის სამსახურმა ფედერაციის მიერ აფხაზეთში გადარიცხული თანხების ხარჯვის მიზნობრიობა შეამოწმა და დაადგინა, რომ 5.77 მილიონი დოლარი გაფლანგულია. დარღვევები გამოწვეული იყო შემდეგი ფაქტორებით: დეფაქტო აფხაზეთში ეკონომიკური სტანდარტების ნაკლებობით. კერძოდ, საპროექტო დოკუმენტაციებზე არ ტარდებოდა სახელმწიფო ექსპერტიზა; პროექტის მიმდინარეობის პროცესში კონტრაქტორებს ბიუჯეტის ცვლილება დამოუკიდებლად შეეძლოთ, რაც მასალებისა და მშენებლების მომსახურების ფასების ზრდას იწვევდა. გარდა ამისა, დეფაქტო მთავრობა თავად ირჩევდა კონტრაქტორებს. ეს კი იმას ნიშნავს, რომ სახელმწიფო ტენდერები არ ტარდებოდა.

BBC-ის ცნობით, რუსეთის სახელმწიფო აუდიტის სამსახურის ვებგვერდზე გამოქვეყნებულია დეფაქტო აფხაზეთისთვის გამოყოფილი ფინანსების ხარჯვის ანალიზი, რომელიც 2010-2012 წლებს მოიცავს. ყველა შემოწმებისას, აუდიტორები დარღვევებს პოულობდნენ.

დარღვევების მიუხედავად, რუსეთის ფედერაცია აფხაზეთის დაფინანსებას აგრძელებს. მხოლოდ 2017 წლის პირველ ნახევარში აფხაზეთის დეფაქტო მთავრობამ ოფიციალური მოსკოვისგან 78 მილიონი დოლარი მიიღო.

"Кавказский Узел"-ს რედაქტორი გრიგორი შვედოვის განცხადებით, რუსეთის ფედერაციის გავლენა აფხაზეთზე ეკონომიკური თვალსაზრისით - უდიდესია. "თუმცა აფხაზეთს, სამხრეთ ოსეთისგან განსხვავებით, არ სურს გახდეს რუსეთის ნაწილი. მაგრამ მოსკოვის მზარდი გავლენა მის რეალურ დამოუკიდებლობას თანდათანაც სულ უფრო ამცირებს", - ამბობს შვედოვი.