ანაკლის პორტის ტერიტორია ყოფილმა მესაკუთრეებმა 15 აპრილამდე უნდა დატოვონ

ანაკლიის პორტის არეალში მყოფმა მესაკუთრეებმა პროექტის ფარგლებში გამოსყიდული მიწის ნაკვეთები და უძრავი ქონება 15 აპრილამდე უნდა დატოვონ. იმ შემთხვევაში, თუ მესაკუთრე უარს იტყვის შეთავაზებულ კომპენსაციაზე, სახელმწიფოს ექსპროპრიაციის უფლება ეძლევა. განსახლების ბიუჯეტი 96 ლარია. განსახლების პოლიტიკის ჩარჩო მთავრობამ უკვე დაამტკიცა.

პორტის მშენებლობის არეალში 505 მიწის ნაკვეთი და 50 საცხოვრებელი სახლი, 1 კომერციული ობიექტი და 255 სათავსო ექცევა. საკომპენსაციო მიწის ნაკვეთები 8 კატეგორიად დაიყო და შესაბამისად, განსხვავებული კომპენსაციები გაიცემა. კომპენსაცია გათვალისწინებულია მოსავლის, ხეხილისა და ადგილმონაცვლეობისთვისაც. მიწის ნაკვეთებისთვის კომპენსაციის ჯამური მოცულობა 78,5 მლნ ლარია, შენობების 6.99 მლნ, ხეხილისთვის 1,06 მლნ, მესერებისთვის 0,6 მლნ, ერთწლიანი კულტურებისთვის 0,3 მლნ, ხოლო ადგილმონაცვლეობის დახმარებისთვის 0,58 მლნ.

გამოთავისუფლებული მიწის ნაკვეთები ინვესტორს გადაეცემა, რომელიც პორტის მშენებლობას შემოდგომიდან დაიწყებს. პროექტის განხორციელებისთვის 1 051 317 კვ.მეტრია, ჯამში, საჭირო. ანაკლიის პორტის მშენებლობის I ფაზა, ჯამური 339 ჰექტარიდან, 110 ჰექტარი ტერიტორიის განვითარებას გულისხმობს.

წინასწარი საპროექტო გადაწყვეტილების თანახმად, I ფაზა მოიცავს ყველა ძირითადი საზღვაო და ხმელეთზე განსათავსებელი ინფრასტრუქტურული ერთეულის მოწყობას. იგეგმება ორი საკონტეინერო ნავსაბელის მშენებლობა 675 მ სიგრძის ჯებირით.