რთველი 2018-ის მთავარ მონაპოვრად მევენახეებსა და კომპანიებს შორის ფასზე ვაჭრობა სახელდება

საქართველოში "რთველი 2018" დასასრულს უახლოვდება. რთველის საკოორდინაციო შტაბის ხელმძღვანელის ღვინის ეროვნული სააგენტოს თავმჯდომარის მოადგილეს ანდრო ასლანიშვილს თქმით, საბოლოოდ საქართველოს მასშტაბით, მოსავალი 15 ოქტომბრისთვის დაბინავდება. ინფორმაციას Business Time-ი ავრცელებს.

ანდრო ასლანიშვილის თქმით, ამ დროისთვის მევენახეების შემოსავალმა ჯამში 300 მლნ ლარს მიაღწია, რაც 2018 წლის რთველის დადებითად შეფასების შესაძლებლობას იძლევა.

„რთველის ოფიციალურად დასრულების შემდეგ გაკეთდება საბოლოო შეფასება, თუმცა ახლა შემიძლია გითხრათ,  რომ ამ დროისთვის, კახეთში 225 ათასი ტონა ყურძენია გადამუშავებული, მაშინ როდესაც 2017 წელს ეს რიცხვი 125 ათასი ტონას უტოლდებოდა, რაჭა-ლეჩხუმში კი შარშანდელი 800 ტონა ყურძნის ნაცვლად, წელს 1500 ტონა ყურძნის გადამუშავება მოხდა“, - განაცხადა საკოორდინაციო შტაბის ხელმძღვანელმა.

წელს გადაწყდა, რომ სახელმწიფო რთველის სუბსიდიას აღარ განახორციელებდა, სწორედ ამასთან დაკავშირებით, ასლანიშვილი ამბობს, რომ მნიშვნელოვანია, რომ წელს მევენახეებსა და კომპანიებს შორის ყურძნის ფასზე ვაჭრობა გაიმართა: "ვფიქრობ, რთველი 2018-ის მთავარი მონაპოვარი არის, ის რომ მათი ურთიერთობა მოლაპარაკებისა და ვაჭრობის სახით იმართებოდა", - ამბობს ასლანიშვილი

"ჩვენ ამ რთველმა კიდევ ერთხელ დაგვანახა, რომ უმჯობესია ჩვენი ძალისხმევა ქართული ღვინის პოპულარიზაცისა და კონიუნქტურის გაჟანსაღებისკენ მივმართოთ, ვიდრე ხელოვნური ჩარევის ხარჯზე მოვახდინოთ მდგომარეობის გამოსწორება", - თქვა ანდრო ასლანიშვილმა.

რთველის საკოორდინაციო შტაბის ხელმძღვანელის თქმით, 2017 წელს ყურძენს 230 კომპანია იბარებდა, წელს კომპანიების რიცხვი 280-მდე გაიზარდა.

როგორც psnews-თან ინტერვიუში ასლანიშვილმა თქვა, კომუნიკაცია მევენახეებსა და მეწარმეებს შორის  რთველის პროცესში სრულად შედგა. 2007 წლის შემდეგ პირველმა არასუბსიდირებულმა რთველმა აჩვენა, რომ მეწარმეებიც და მევენახეებიც მზად არიან მეღვინეობის დარგის მდგრადი განვითარების პროცესში ჩასართავად.