გოგა ხაინდრავას განცხადებით, ცალკეული ჯგუფების ზეწოლის შემდეგ, მისი ფილმი აღარ დაფინანსდა

კინორეჟისორი გოგა ხაინდრავა აფხაზეთის მთავრობის თავმჯდომარეს პასუხს სთხოვს კითხვაზე, რატომ გაიწვია უკან მთავრობისთვის გადაგზავნილი პროექტი, რომელზეც კინორეჟისორი აფხაზ კოლეგებთან ერთად მუშაობდა და რომელიც, ნაწილობრივ, აფხაზეთის მთავრობას უნდა დაეფინანსებინა.

გოგა ხაინდრავას განცხადებით, აფხაზეთის მთავრობის თავმჯდომარე გარკვეული მედიასაშუალებების გავლენის ქვეშ მოექცა.

„დაახლოებით ერთი წლის წინ, ჩვენ სტუდიაში დავიწყეთ მუშაობა; დავუკავშირდით კოლეგებს აფხაზეთში, სოხუმში, ისტორიკოსებს, იმ ადამიანებს, ვინც ამაში არიან გარკვეულნი. მოვიძიეთ უამრავი მასალა, სადაც აღწერილია ის ბარბაროსობა, რაც ჩადენილი აქვთ რუსებს მთლიანად კავკასიასა და კონკრეტულად, აფხაზეთში. ეს პროექტი არის ჩაფიქრებული და ხორციელდება ორივე მხარის მიერ, რასაც, პრინციპში, აქამდე ადგილი არ ჰქონია და ამას მოჰყვა ძალიან მკვეთრი რეაქცია როგორც აფხაზეთში, ისე - საქართველოში. იქაური რეაქცია გასაგებია, იქ მთლიანად კონტროლდება რუსეთის ფე-ეს-ბე-ს მიერ ყველაფერი. საქართველოში ამას სათავეში ედგა „ნაციონალური მოძრაობა“, მიხეილ სააკაშვილი, ტელევიზია „მთავარი“, „ფორმულა“ ,- რომ თითქოს რაღაც 100 000 გამომიყვეს და ჩვენ ეს თანხა ავიღეთ. ესაა სრული სიცრუე. ჩვენ შევიტანეთ განაცხადი ციკლზე „სიმართლე აფხაზეთის შესახებ“ და ის ბიუჯეტი, რომელიც შეიძლება, დაჯდეს მსგავსი ციკლი. მოთხოვნილი თანხა არის მთლიანი პროექტის 1/3 და ამ ბიუჯეტიდან 2/3-ს ვიღებდით ჩვენ თავზე. ამ ციკლის პირველი ფილმი უნდა ყოფილიყო მუხაჯირები. იმ ბულინგის შედეგად, რომელიც განხორციელდა, აფხაზეთის მთავრობის ხელმძღვანელმა, აბაშიძემ დაიბარა კულტურის მინისტრი ნიჟარაძე და განკარგულება გასცეს, რომ პროექტი შეჩერდეს. თუ ვინმესთვის ეს ფილმი საფრთხეს წარმოადგენდა, ეს იყო რუსეთი. მხოლოდ ისეთი უგუნური და უსინდისო ადამიანი, როგორიცაა დევნილი გვარამია შეიძლება იყოს მსგავსი პროექტების მოწინააღმდეგე, რადგან პირდაპირ ასრულებს იმ დავალებებს, რომლებიც მოსდის საქართველოს ფარგლებს გარედან. ვუსვამ კითხვას ბატონ აბაშიძეს: რატომ გააჩერა პროექტი? რა უდევს ამას საფუძვლად? რამ განაპირობა მისი გადაწყვეტილება ამ პროექტის გაჩერების შესახებ“ - აცხადებს რეჟისორი.