ნიკა ვაჩეიშვილი: იუსნეკოს სიიდან ტაძრის ამოღება 2009 წელს დაწყებულ რესტავრაციას არ უკავშირდება

კულტურული მემკვიდრეობის დაცვის სააგენტოს ყოფილი უფროსი, რომელიც ამავე დროს ბაგრატის ტაძრის რესტავრაციის ერთ-ერთი ხელმძღავნელი იყო, აცხადებს, რომ იუსნეკოს სიიდან ტაძრის ამოღება 2009 წელს დაწყებულ რესტავრაციას არ უკავშირდება.

„1994 წელს, იუნესკოს ჰქონდა შეცდომა დაშვებული, ორი სხვადასხვა ტიპის ძეგლი ჰყავდა შეყვანილი ერთ ნომინაციაში. ახლა ეს გაიყო და დაიწყო ორი სხვადასხვა ბიოფრაფია“, - აცხადებს ვაჩეიშვილი.

„ეს რესტავრაცია გარდაუვალი იყო, ისევე როგორც გელათის კონსერვაცია. ამიტომ ცოტა წინ რომ გაეხედა იუნესკოს და ორი ნომინაცია გაეკეთებინა უკეთესი იქნებოდა. ეს ასეც მოხდება უახლოეს მომავალში“, - აცხადებს ნიკა ვაჩეიშვილი.

ბაგრატის ტაძარი იუნესკომ მსოფლიო მემკვიდრეობის ნუსხიდან ამოიღო. ეს გადაწყვეტილება იუნესკოს მსოფლიო მემკვიდრეობის კომიტეტის 41-ე სესიაზე მიიღეს, რომელიც კრაკოვში გაიმართა.

გელათის სამონასტრო კომპლექსი იუნესკოს მსოფლიო მემკვიდრეობის ნუსხაში რჩება. 

1994 წელს გელათი, ბაგრატთან ერთად, მსოფლიო მემკვიდრეობის ნუსხაში შევიდა. 2010 წელს, ბაგრატის რეკონსტრუქციის შემდეგ, ბაგრატი და გელათი საფრთხის ქვეშ მყოფი მსოფლიო მემკვიდრეობის ძეგლთა ნუსხაში გადაიტანეს.

ნიკა ვაჩეიშვილი 2013 წლის იანვრამდე საქართველოს კულტურული მემკვიდრეობის დაცვის ეროვნული სააგენტოს ხელმძღვანელი იყო. ის ამ თანამდებობიდან თავისი სურვილის წინააღმდეგ კულტურის მაშინდელმა მინისტრმა გურამ ოდიშარიამ გაათვისუფლა. ვაჩეიშვილის გათავისუფლების ერთ-ერთი მიზეზი მისი ბაგრატის ტაძრის რესტავრაციაში მონაწილეობა და ამ ფაქტით იუნესკოში არსებული უკმაყოფილება დასახელდა.