CNN: ტრამპი ამტკიცებს, რომ მზად არის ირანთან ომი აწარმოოს „სამუდამოდ“, თუმცა ბრძოლის დაწყებიდან სულ რამდენიმე დღეში, მის გარემოცვაში ბევრს უკვე ამ სიტუაციიდან გამოსვლა სურს

აშშ-ის პრეზიდენტი დონალდ ტრამპი ამტკიცებს, რომ მზად არის ირანთან ომი აწარმოოს „სამუდამოდ“, თუმცა ბრძოლის დაწყებიდან სულ რამდენიმე დღეში, მის გარემოცვაში ბევრს უკვე ამ სიტუაციიდან გამოსვლა სურს, - წერს CNN-ი სტატიაში სათაურით „ტრამპის მრჩევლები ირანთან დაკავშირებული პოლიტიკური კოშმარის განმუხტვას ცდილობენ, მაშინ როცა პრეზიდენტი საინფორმაციო ქაოსს აღვივებს“.

ინფორმირებული წყაროები აცხადებენ, რომ აშშ-ის თავდასხმამ ირანზე ტრამპის თანაშემწეებსა და მრჩევლებს შორის შიში გააჩინა იმ პოლიტიკური შედეგების გამო, რაც შეიძლება მოჰყვეს ხანგრძლივ ომში ჩათრევას, რომელსაც არც მკაფიო ფინალი აქვს და არც საზოგადოების მხარდაჭერა.

კონფლიქტს უკვე ემსხვერპლა ექვსი ამერიკელის სიცოცხლე, ოფიციალური პირები კი მომდევნო დღეებში მსხვერპლის რაოდენობის ზრდას პროგნოზირებენ.

საფონდო ბირჟაზე ქაოსია, საწვავის ფასები კი იზრდება, რაც საფრთხეს უქმნის ტრამპის შუალედური არჩევნების კამპანიის მთავარ საყრდენს. ადმინისტრაციის შიგნით კი თანაშემწეები კვლავაც ცდილობენ ახსნან, თუ რატომ ჩაება ქვეყანა ომში და რა იქნება შემდეგ.

„ეს პოლიტიკური რისკია, ყოველგვარი „თუმცასა“ და „მაგრამის“ გარეშე“, - განაცხადა ტრამპის ერთ-ერთმა მრჩეველმა იმ თავდასხმის შესახებ, რომელიც, პრეზიდენტის პროგნოზით, შესაძლოა კვირების განმავლობაში გაგრძელდეს. „უბრალოდ ვიმედოვნოთ, რომ რაიმე ძალიან ცუდად არ წავა. რადგან, თუ ეს მოხდება, სერიოზული პრობლემა შეგვექმნება“.

„ტრამპმა პირველადი დარტყმები უდიდეს წარმატებად შეაფასა და ისინი აშშ-ის სამხედრო ძლიერების დასტურად და იმ გადაწყვეტილების გამართლებად წარმოაჩინა, რომელიც დიპლომატიაზე უარის თქმასა და ძალის დემონსტრირებას გულისხმობდა“, - ნათქვამია სტატიაში.

მიუხედავად ამისა, ვიდრე ტრამპი ადრეულ წარმატებას იმის ნიშნად აღიქვამს, რომ საზოგადოებამ შესაძლოა მხარი დაუჭიროს შეტევის გაგრძელებას, ზოგიერთი მრჩეველი და ახლო მოკავშირე ჩუმად საპირისპიროს ამტკიცებს - ისინი მას მოუწოდებენ, დააჩქაროს თავისი გეგმა და გამოაცხადოს გამარჯვება მაშინვე, როგორც კი ამას სარწმუნოდ შეძლებს.

ადრეული გამოკითხვებით, ირანთან ომი საზოგადოებაში ფართო არაპოპულარობით სარგებლობს. ამომრჩევლები უფრთხიან ახალ დაპირისპირებაში ჩაბმას ახლო აღმოსავლეთში და მათთვის გაუგებარია ადმინისტრაციის მიზნები.

„ამან ასევე განხეთქილება გამოიწვია MAGA-ს მოძრაობის გავლენიან ფიგურებს შორის - მოძრაობისა, რომელიც ნაწილობრივ ტრამპის 2016 წლის იმ პირობაზე დაშენდა, რომ ის „უარს იტყოდა სახელმწიფოს მშენებლობისა და რეჟიმის შეცვლის წარუმატებელ პოლიტიკაზე“ - ეს კი აჩენს შიშს, რომ უკმაყოფილებამ შესაძლოა, საბოლოოდ, ტრამპის უფრო ფართო ამომრჩეველზეც გადაინაცვლოს“, - წერს CNN-ი.