ჯეიჰუნ ბაირამოვი: როდესაც არის ომი, შესაძლოა კონფლიქტი დავაფიქსიროთ ერთ რეგიონში, გარკვეული დროით, მაგრამ შეუძლებელია, რომ განჭვრიტოთ მისი განვითარება და საბოლოო შედეგები. ჩვენ უნდა ვეძიოთ გამოსავალი. თუ ეს არ იქნება, მიღწეული საშიშროება უფრო გაიზრდება როგორც კონფლიქტში ჩართული ქვეყნებისთვის, ისე მთელი რეგიონისთვის

ყოველი კონფლიქტი შეიცავს გარკვეულ რისკს. როდესაც არის ომი, შესაძლოა კონფლიქტი დავაფიქსიროთ ერთ რეგიონში გარკვეული დროით, მაგრამ შეუძლებელია, რომ განჭვრიტოთ მისი განვითარება და საბოლოო შედეგები. ჩვენ უნდა ვეძიოთ გამოსავალი, ვეძიოთ გზები, რომელიც გამოგვიყვანს მდგომარეობიდან. თუ ეს არ იქნება მიღწეული, საშიშროება უფრო გაიზრდება როგორც კონფლიქტში ჩართული ქვეყნებისთვის, ისე მთელი რეგიონისთვის, - განაცხადა აზერბაიჯანის საგარეო საქმეთა მინისტრმა ჯეიჰუნ ბაირამოვმა სტამბოლში გამართულ ერთობლივ ბრიფინგზე.

მას მედიის წარმომადგენელმა ირანსა და უკრაინაში არსებულ ვითარებაზე დაუსვა შეკითხვა.

ჯეიჰუნ ბაირამოვის თქმით, როგორც მონაწილე ქვეყნებისთვის, ასევე, მთელი რეგიონისთვის აუცილებელია, რომ გამოიძებნოს გზები ამ კონფლიქტების შესაჩერებლად.

„დაინტერესებულები ვართ, რომ ირანში კონფლიქტი რაც შეიძლება მალე დასრულდეს და მშვიდობა დამყარდეს როგორც სამეზობლო გარემოში, ასევე, რეგიონულად და ფართო მასშტაბით. ჩვენ ყველანი ვართ მოწმენი გეოგრაფიული ცვლილებებისა, რაც მოიტანა რუსეთ-უკრაინის ომმა. დაიწყო უკვე ამ ომმა ზეგავლენის მოხდენა შავი ზღვის რეგიონზეც. გაფართოვდა არეალი კონფლიქტისა და ყოველდღიურად ჩვენ ამის მოწმენი ვხდებით.

მედიამ გამოაცხადა, რომ აზერბაიჯანის რამდენიმე მოქალაქე დაიღუპა. ჩვენ უნდა ვეძიოთ გამოსავალი, ვეძიოთ გზები, რომელიც გამოგვიყვანს მდგომარეობიდან. მნიშვნელოვანია სტრატეგიული გადაწყვეტილებების მიღება, რომელიც მისაღები იქნება ორივე მხარისთვის. თუ ეს არ იქნება მიღწეული, საშიშროება უფრო გაიზრდება როგორც კონფლიქტში ჩართული ქვეყნებისთვის, ისე მთელი რეგიონისთვის“, - განაცხადა ჯეიჰუნ ბაირამოვმა.

სტამბოლში დღეს საქართველოს, თურქეთისა და აზერბაიჯანის საგარეო საქმეთა მინისტრების რიგით მეათე სამმხრივი შეხვედრა იმართება. სამმხრივი მინისტერიალის ფარგლებში ხელი მოეწერა საგარეო საქმეთა მინისტრების ერთობლივ განცხადებას - სტამბოლის დეკლარაციას.

პრესკონფერენციაში ასევე მონაწილეობენ თურქეთის საგარეო საქმეთა მინისტრი ჰაქან ფიდანი და საქართველოს ვიცე-პრემიერი, საგარეო საქმეთა მინისტრი მაკა ბოჭორიშვილი.