კობახიძე მაჩალიკაშვილზე: თუ ტერორიზმი გამოვლინდება, სათანადო რეაგირება ქისტებს ექნებათ

ქისტებისთვის ისეთივე მიუღებელია ტერორიზმი, როგორც ქართველებისთვის. აქედან გამომდინარე, თუ ასეთი რამ გამოვლინდება, ბუნებრივია, სათანადო რეაგირება ექნებათ პირველ რიგში ქისტებს, - ასეთი კომენტარი გააკეთა საქართველოს პარლამენტის თავმჯდომარე ირაკლი კობახიძემ მალხაზ მაჩალიკაშვილის შესახებ სუსის მიერ გავრცელებულ განცხადებასთან დაკავშირებით.

"ქისტები არიან ჩვენი ძმები. ჩვენ გვაკავშირებს ისტორიული თანაცხოვრება და მეგობრობა. მათთვის ისეთივე მიუღებელია ტერორიზმი, როგორც ქართველებისთვის. აქედან გამომდინარე, თუ ასეთი რამ გამოვლინდება, ბუნებრივია, სათანადო რეაგირება ექნებათ პირველ რიგში ქისტებს. რაც შეეხება მისაბაძ მაგალითს, მისაბაძი მაგალითი უნდა გამომდინარეობდეს სახელმწიფოებრივი მიდგომიდან. უნდა გაირკვეს, ვის აქვს სახელმწიფოებრივი მიდგომა და ვის არა.

ზუსტად ამ პრინციპით ხელმძღვანელობენ ქისტები და ამით იხელმძღვანელებენ მომავალშიც. ისინი არიან ჩვენი საზოგადოების სამაგალითო წევრები. საგამოძიებო ორგანოებმა ყველაფერს უნდა გასცენ სათანადო პასუხი. ეს პასუხი უნდა იყოს დამყარებული კონკრეტულ არგუმენტებზე, ფაქტებზე და ასეთ შემთხვევაში ყველამ უნდა იმოქმედოს სახელმწიფოებრივად. ეს არის მთავარი ამოცანა“, – განაცხადა ირაკლი კობახიძემ.

მალხაზ მაჩალიკაშვილი სუსის მიერ გავრცელებული ჩანაწერების საპასუხოდ Facebook-ზე განცხადებას ავრცელებს. მისი თქმით, ხელისუფლება მის წინააღმდეგ და ასევე მისი ოჯახის წინააღმდეგ მიმართულ ემოციურ, საინფორმაციო და სამართლებრივ ომს განაგრძობს.

7 მაისს სახელმწიფო უსაფრთხოების სამსახურმა სკანდალური საუბრის ფარული აუდიო ჩანაწერი გაასაჯაროვა, რომელშიც გამოძიების მტკიცებით, მალახაზ მაჩალიკაშვილი მის ძმისშვილს ტერორისტული აქტის მომზადებას ავალებს. ამ საქმეზე მალხაზ მაჩალიკაშვილის ძმისშვილი დაკითხეს, თავად მაჩალიკაშვილი კი ჩანაწერს ფაბრიკაციას უწოდებს.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი -  შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაჭრეს, რამდენიმე პირი კი დააკავეს. 

თემირლან მაჩალიკაშვილი საავადმყოფოში 10 იანვარს გარდაიცვალა. 

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა,რომელშიც  ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებსა და პანკისის უხუცესებს არ სჯერათ, რომ მაჩალიკაშვილს აჰმედ ჩატაევსა და ტერორისტებთან კავშირი ჰქონდა. მათ არაერთხელ გამართეს საპროტესტო აქცია.