საერთაშორისო თანამეგობრობა აფხაზეთის ე.წ. საპრეზიდენტო არჩევნებს გმობს

ფინეთისა და აზერბაიჯანის საგარეო საქმეთა სამინისტროები აფხაზეთში ე.წ. საპრეზიდენტო არჩევნების ჩატარებას ეხმაურებიან. შესაბამისი განცხადებები უწყებების Twitter-ზე გამოჩნდა. 

„ფინეთი საქართველოს სუვერენიტეტის სრულ მხარდაჭერას ადასტურებს. ჩვენ არ ვცნობთ აფხაზეთში 25 აგვისტოს ე.წ. „არჩევნების“ ჩატარებას, რომლებიც საქართველოს ტერიტორიულ მთლიანობას არღვევს“, - ნათქვამია ფინეთის საგარეო საქმეთა უწყების განცხადებაში. 

— Ulkoministeriö (@Ulkoministerio) August 26, 2019

მსგავსი განცხადება აზერბაიჯანის საგარეო საქმეთა სამინისტროს პრესსპიკერმა ლეილა აბდულაევამაც გამოაქვეყნა:

„აზერბაიჯანის საგარეო საქმეთა სამინისტრო ადასტურებს საქართველოს სუვერენიტეტის და ტერიტორიული მთლიანობის მხარდაჭერას და არ ცნობს 2019 წლის 25 აგვისტოს საქართველოს რეგიონში, აფხაზეთში ჩატარებულ ე.წ. „საპრეზიდენტო არჩევნებს“ და მათ შედეგებს“. 

— Leyla Abdullayeva (@LAbdullayevaMFA) August 26, 2019

ე.წ. არჩევნებს ევროპის საბჭოს საპარლამენტო ასამბლეაშიც გამოეხმაურნენ. 

„სრულიად ვუჭერთ მხარს საქართველოს ტერიტორიულ მთლიანობას და სუვერენიტეტს. შესაბამისად 2019 წლის 25 აგვისტოს საქართველოს რეგიონ აფხაზეთში ჩატარებული ე.წ. „საპრეზიდენტო არჩევნები“ არც კანონიერია და არც ლეგიტიმური. როგორც ადრე აღვნიშნეთ, ეს „არჩევნები“ ხელს უშლის კონფლიქტის მშვიდობიან მოგვარებას და ხალხის გაერთიანების ნაცვლად მათ ერთმანეთს აშორებს. ამის მხოლოდ დაგმობა შეგვიძლია“, - ნათქვამია განცხადებაში.  

ე.წ. არჩევნებს Facebook-ის პირად გვერდზე გამოეხმაურა ცენტრალურ აზიასა და კავკასიაში ნატოს გენერალური მდივნის სპეციალური წარმომადგენელი ჯეიმს აპატურაი.

„ნატო არ აღიარებს 25 აგვისტოს საქართველოს რეგიონ აფხაზეთში ე.წ. არჩევნების ჩატარებას. ნატოს მოკავშირეები არ აღიარებენ საქართველოს რეგიონების - აფხაზეთის და სამხრეთ ოსეთის დამოუკიდებლობას. ნატო მხარს უჭერს საქართველოს ტერიტორიულ მთლიანობას და სუვერენიტეტს საერთაშორისოდ აღიარებულ საზღვრებში“, - დაწერა აპატურაიმ. 

მანამდე ე.წ. არჩევნები უკრაინის საგარეო საქმეთა სამინისტრომაც დაგმო. 

ოკუპირებულ აფხაზეთში ე.წ. საპრეზიდენტო არჩევნები 25 აგვისტოს ჩატარდა. პრეზიდენტის პოსტისთვის 9 კანდიდატი იბრძოდა. ე.წ. არჩევნების შედეგები ჯერჯერობით უცნობია, თუმცა დეფაქტო პრეზიდენტის რაულ ხაჯიმბას განცხადებით, ძალიან დიდია მეორე ტურის ალბათობა. 

საქართველოს პრეზიდენტმა სალომე ზურაბიშვილმა „არჩევნებს“ არალეგიტიმური უწოდა.