აბაშიძე: ნიუ-იორკში ჟენევის ფორმატის გაუმჯობესებაზე მსჯელობენ

რუსეთთან ურთიერთობის საკითხებში პრემიერმინისტრის სპეციალური წარმომადგენლის ზურაბ აბაშიძის თქმით, ოკუპაციის საკითხებთან დაკავშირებით საჭიროა გაეროს უმაღლესი ტრიბუნის მაქსიმალურად გამოყენება. ვფიქრობ ამ დღეების განმავლობაში ეს მოხერხდება, - განაცხადა აბაშიძემ „იმედის“ გადაცემაში „პირისპირ“.

ზურაბ აბაშიძის თქმით, მნიშვნელოვანია, რომ „ასეთი სოლიდარობა და მხარდაჭერა იგრძნობა ჩვენი პარტნიორების მხრიდან“:

„ჩვენ მაქსიმალურად უნდა გამოვიყენოთ ყველა საშუალება, ყველა ფორმატი როგორც მრავალმხრივი, ასევე ორმხრივი ჩვენი დასავლელი პარტნიორების დახმარებით, შუამდგომლობით, იმისათვის რათა რეალური შედეგები მივიღოთ, რაღაც ნაბიჯები გადაიდგას იმ ადამიანების დასახმარებლად, რომლებიც ოკუპირებულ ტერიტორიებზე, გამყოფ ხაზებთან ცხოვრობენ. რა თქმა უნდა, ძალიან მნიშვნელოვანია განცხადებების მიღება და შემუშავება, მაგრამ რეალური შედეგები უფრო გვაინტერესებს ჩვენ, რათა ადამიანებმა იგრძნონ ეს“, - თქვა ზურაბ აბაშიძემ.

პრემიერის სპეციალური წარმომადგენლის განცხადებით, საქართველოს დასავლელი პარტნიორების მოსაზრებაა, რომ ჟენევის ფორმატის შესაძლებლობები სრულად არ არის გამოყენებული, „სწორედ ამაზე მიმდინარეობს ახლა ნიუ-იორკში საუბარი თუ როგორ ამაღლდეს ეფექტურობა და შედეგიანობა ჟენევის საერთაშორისო მოლაპარაკებების“ და დასძინა, რომ „რაღაც ნაბიჯის გადადგმის იმედი აქვს“. 

რაც შეეხება „პრაღის ფორმატს“, ზურაბ აბაშიძის განმარტებით, იქ პრობლემა ის არის, რომ რუსეთთან სავაჭრო-ეკონომიკური ურთიერთობების აღდგენის თვალსაზრისით ბოლო წლების განმავლობაში „რაღაც მოძრაობა იყო, მაგრამ პოლიტიკური მიმართულებით იქ არანაირი პროგრესი არ არის. ეს ძალიან დიდ წინააღმდეგობაშია ერთმანეთთან. სწორედ ამის ახსნას ვცდილობთ ჩვენი დასავლელი პარტნიორებისთვის - თუ არ გადაიდგა რაღაც ნაბიჯები პოლიტიკური პრობლემების მოგვარების თვალსაზრისით და თუ იქ დინამიკა არ გაჩნდა, ეს წინააღმდეგობები ყოველთვის დიდ პრობლემებს გამოიწვევს“.

„ჩვენი დასავლელი პარტნიორების რეკომენდაცია ყოველთვის იყო და ცალსახად არის რუსეთთან დიალოგის გაგრძელება. ამას გვირჩევენ ჩვენც, რუსეთის სხვა მეზობლებსაც, მათ შორის ჩვენს უკრაინელ მეგობრებს. ისინი რა თქმა უნდა, ჩვენ მაქსიმალურად გვიჭერენ მხარს და მაქსიმალურად ცდილობენ, რომ მათი მხრიდანაც იყოს გარკვეული ზეწოლა რუსეთზე, მაგრამ ჩვენი გასავლელი გზა ჩვენ უნდა გავიაროთ და რუსეთთან უნდა ვაწარმოოთ დიალოგი, იმისთვის რათა გამოინახოს რაღაც შეხების წერტილები“, - განაცხადა აბაშიძემ.

17 სექტემბერს ნიუ-იორკში გაეროს გენერალური ასამბლეა გაიხსნა, რომელშიც ქართული დელეგაცია საქართველოს პრეზიდენტის ხელმძღვანელობით მონაწილეობს. 25 სექტემბერს სალომე ზურაბიშვილი გენერალური ასამბლეის 74-ე სესიაზე სიტყვით გამოვა. ის სესიის ფარგლებში დაგეგმილ ღონისძიებებში მონაწილეობს. გაეროს ფორმატში იმართება მაღალი დონის თემატური შეხვედრები, მათ შორის, მდგრადი განვითარების მიზნების, უნივერსალური ჯანდაცვისა და კლიმატის საკითხებზე. პრეზიდენტის მონაწილეობით იგეგმება ორმხრივი შეხვედრები სხვადასხვა ქვეყნის ლიდერებთან და გაეროს გენერალურ მდივანთან. ზურაბიშვილი გაეროს გენერალური ასამბლეის სესიაში მონაწილეების პატივსაცემად დონალდ ტრამპისა და მისი მეუღლის სახელით გამართულ ოფიციალურ მიღებას დაესწრება. სესია 27 სექტემბერს დაიხურება.