ხაზარაძე: მე ჩემი უზარმაზარი გუნდით დავდგები იქ, სადაც თავისუფლებას საფრთხე დაემუქრება

მე ჩემი უზარმაზარი გუნდით, „ლელოელებით“, დავდგები თქვენთან ერთად იქ, სადაც თავისუფლებას საფრთხე დაემუქრება. პროტესტი იქნება ძლიერი და არ გასცდება კანონის ფარგლებს. შევათანხმოთ ყველა ნაბიჯი ერთმანეთთან, რომ სიურპრიზები არ იყოს, - ამის შესახებ რუსთაველის გამზირზე მიმდინარე აქციაზე, ლოზუნგით „ერთად ერთის წინააღმდეგ“ მოძრაობა „ლელოს“ დამფუძნებელმა მამუკა ხაზარაძემ განაცხადა.

მისი თქმით, გაუგონარი ამბავია ექიმის დაპატიმრება, რომელიც ავადმყოფის საშველად მიდიოდა. მოვუწოდებ ყველას, ვისაც ეს ეხება, საერთაშორისო საზოგადოებას, დიპლომატიურ კორპუსს, ამ უნიათო მთავრობას - სანამ ჩვენ არ ვისწავლით ერთი კაცისთვის, ერთი მოქალაქისთვის ბრძოლას, ჩვენ სულ გაუგებრობაში ვიქნებით. დღეს ყველას ვაჟა გვქვია. ამ კაცმა თქვა, რომ საქართველოს საზღვარი არის ფსოუზე და არა ცხინვალთან. აი, ასეთი ქართველები გვინდა ჩვენ. ასეთ ხალხზე დგას საქართველო, მაგრამ ჩვენი ქვეყანა ვერასდროს გახდება ბოლომდე თავისუფალი, სანამ თავისუფალი ადამიანები არ იცხოვრებენ ქვეყანაში.

ახალგაზრდების ბრძოლამ გამოიღო ის შედეგი, რომლითაც ჩვენ თავისუფალი არჩევნები უნდა ჩაგვეტარებინა - ჩვენი შვილებისთვის, მომავლისთვის და ევროპული ორიენტაციისთვის. ბიძინა ივანიშვილმა და მისმა დამქაშებმა კი მთელი ქვეყანა სამარცხვინოდ მოატყუეს. მინდა ვკითხო ჩვენს მოქალაქეებს - რა წაგართვეს? პასუხია ერთი - თავისუფალი არჩევანის უფლება. მე ჩემი უზარმაზარი გუნდით, „ლელოელებით“, დავდგები თქვენ ერთად იქ, სადაც თავისუფლებას საფრთხე დაემუქრება. პროტესტი იქნება ძლიერი და არ გასცდება კანონის ფარგლებს. შევათანხმოთ ყველა ნაბიჯი ერთმანეთთან, რომ სიურპრიზები არ იყოს“, - განაცხადა ხაზარაძემ.

პარლამენტთან აქცია მიმდინარეობს. 

„ევროპული საქართველოს“, „ლელოს“ და „სახალხო პარტიის“ მხარდამჭერები პარლამენტის მიმდებარე ტერიტორიაზე ოპერის თეატრის ტერიტორიიდან, „ნაციონალური მოძრაობის“ მხარდამჭერები კი პუშკინის სკვერიდან მივიდნენ.

პროტესტს რეგიონებიდანაც შეუერთდნენ. 

აქციის მონაწილეები ვადამდელი საპარლამენტო არჩევნების პროპორციული საარჩევნო სისტემით ჩატარებას, ცესკოს შემადგენლობის შეცვლასა და დროებითი ტექნიკური მთავრობის შექმნას ითხოვენ.

პროტესტი პარლამენტის მიერ პროპორციული საარჩევნო სისტემისთვის საჭირო ცვლილების ჩაგდებას მოჰყვა. 

შეკრებას წინ უძღოდა შეხვედრები „ლეიბორისტული“ პარტიის ოფისში, სადაც პოლიტიკოსები შეთანხმდნენ ფორმულაზე-„ყველა მინუს ივანიშვილი“.

პარალელურად, 17 ნოემბერს, 17:00 საათზე რესპუბლიკის მოედანზე დაგეგმა მანიფესტაცია „პატრიოტთა ალიანსმა“, რომელსაც ორგანიზაცია „ქართული მარში“ და ჯონდი ბაღათურიას „ქართული დასიც“ შეუერთდება.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

საპარლამენტო უმრავლესობა განმარტავს, რა სისტემით ჩატარდება 2020 წლის არჩევნები. განცხადება გაავრცელა მმართველი პარტიის ლიდერმაც. ოპოზიციური პარტიები მხარდამჭერებს პარლამენტთან აქციაზე მისვლისკენ მოუწოდებენ. 

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ.