წნორში კამპანიის „ამხილე მაჟორიტარები“ ფარგლებში აქციაზე დაპირისპირება მოხდა

წნორში, კამპანიის „ამხილე მაჟორიტარები“ ფარგლებში მოსახლეობასთან შეხვედრაზე დაპირისპირება მოხდა. შეხლა-შემოხლა მას შემდეგ მოხდა, რაც ადგილობრივ მკვიდრთა ჯგუფმა „სამოქალაქო მოძრაობის“ ლიდერის ალეკო ელისაშვილის განცხადებები დაგმო, კამპანია „ამხილე მაჟორიტარები“ გააპროტესტა და მხარდამჭერებთან ერთად ამ ტერიტორიის დატოვება მოსთხოვა. სიტუაცია პოლიციის ჩარევის შემდეგ განიმუხტა.

„ვიყავით ბოდბისხევის ბაზარში, დაგეგმილი გვქონდა შეხვედრა ხალხთან. მთელი საქართველოს მასშტაბით დავიწყეთ წურბელა მაჟორიტარების და ფეოდალების მხილების კამპანია, რომლის ფარგლებშიც ჩამოვედით ქიზიყში, რათა ღარიბაშვილ-თამაზაშვილის კლანის ხელისბიჭი ირაკლი შიოლაშვილი გვემხილებინა“, - განაცხადა ელისაშვილმა.

ადგილობრივების თქმით კი, ისინი აპროტესტებენ იმას, რომ ალეკო ელისაშვილი „ნაციონალურ მოძრაობას“ აკრიტიკებდა, ახლა კი მათთან თანამშრომლობს.

ოპოზიციის აქტივისტები რამდენიმე დღეა მართავენ აქციას „მაინც დაგაბოქლომებთ“. მათი მთავარი მოთხოვნა ვადამდელი საპარლამენტო არჩევნების პროპორციული სისტემით ჩატარება და მთავრობის გადადგომაა. გარდა ამისა, ისინი პარლამენტთან დაკავებულებისთვის პატიმრობის მისჯას აპროტესტებენ. 23 ნოემბერს, საქართველოს პრეზიდენტმა ყველა მხარეს საარჩევნო კოდექსზე მუშაობის გაგრძელებისკენ მოუწოდა. 

18 ნოემბერს აქციაზე სამართალდამცველებმა ადმინისტრაციული სამართალდარღვევის ფაქტზე სულ 37 ადამიანი დააკავეს. 18 ნოემბერს სპეცრაზმმა პარლამენტის შესასვლელებს ბოქლომები მოხსნა და ბარიკადებისგან გაათავისუფლა, ასევე რუსთაველის გამზირი კარვებისგან გაწმინდა. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. ამ გადაწყვეტილების გამო უმრავლესობა რამდენიმე წევრმა დატოვა.