ოპოზიციამ არჩევნების „გერმანული მოდელით“ ჩატარებასთან დაკავშირებით კანონპროექტი შეიმუშავა

"ახალი საქართველოს" ლიდერის გიორგი ვაშაძის განცხადებით, ოპოზიციას კონკრეტული მოთხოვნები აქვს, რომლებიც მმართველმა პარტიამ უნდა შეასრულოს. "თუ პლებისციტს შემოგვთავაზებენ, ეს იქნება მათი მხრიდან კიდევ ერთი მოტყუების მცდელობა, ამ საკენკს არავინ აკენკავს", - განაცხადა გიორგი ვაშაძემ.

მისი თქმით, ლეიბორისტების ოფისში შეხვედრაზე ოპოზიციის ლიდერები ასევე იმსჯელებენ ე.წ. გერმანულ მოდელზე დაფუძნებული საარჩევნო სისტემის კანონპროექტის შინაარსის შესახებაც, რომელიც ვაშაძის თქმით ბოლო დღეების განმავლობაში მუშაობის შედეგად შეიმუშავა ოპოზიციამ. 

"ბოლო სამი დღე ინტენსიური მუშაობის შედეგად, შევიმუშავეთ კანონპროექტი, რომელიც სრულად შეესაბამება კონსტიტუციას, მაქსიმალურად გამოხატავს იმ მოთხოვნებს, რაც ჩვენ გვაქვს. ეს სრულად პროპორციული არ არის, მაგრამ ეფუძნება "გერმანულ მოდელს", თუმცა ითვალისწინებს იმ რეალობას, რაც საქართველოშია შექმნილი.

ახალი რამ რაც ჩნდება, ის არის, რომ მრავალმანდატიანი მაჟორიტარული ოლქები იქნება და ეს მნიშვნელოვან გამოსავალს იძლევა, რომ 35 ან 25%-იანმა პარტიამ ვერ მიიღოს უმრავლესობა პარლამენტში და ეს მიიღოს ვინმემ მხოლოდ მაშინ, თუ მას მხარს უჭერს 50%-ზე მეტი, ანუ დაახლოებით იგივე სულისკვეთებაა, რაც არის პროპორციული არჩევნების პირობებში", - განაცხადა გიორგი ვაშაძემ. 

ოპოზიცია დღეს პარლამენტის პიკეტირებას გეგმავს. "ქართული ოცნების" ოფისში გამართულ ბრიფინგზე კი პარტიის გენმდივანმა კახა კალაძემ განაცხადა, რომ 2020 წლის არჩევნებზე შერეული საარჩევნო სისტემა შენარჩუნდება. რამდენიმე დღიანი კონსულტაციების შემდეგ გაირკვა, რომ მმართველ პარტიაში აკაკი ზოიძის ინიციატიატივა პროპორციულ საარჩევნო სისტემაზე გადასვლის საკითხზე რეფერენდუმის ან პლებისციტის ჩატარებაზე, არ მიიღეს. მანამდე კი დიმიტრი ხუნდაძემ ქვეყანას სრულ მაჟორიტარულ სისტემაზე გადასვლა შესთავაზა. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. ამ გადაწყვეტილების გამო უმრავლესობა რამდენიმე წევრმა დატოვა.