მარგველაშვილმა ზუგდიდში პრეზიდენტის არჩევის წესსა და უშიშროების საბჭოს გაუქმებაზე ილაპარაკა

ზუგდიდში მიმდინარე საკონსტიტუციო განხილვაზე საქართველოს პრეზიდენტმა გიორგი მარგველაშვილმა განაცხადა, რომ საკონსტიტუციო კომისიას მართლაც ბევრი საინტერესო ცვლილება აქვს დაგეგმილი კონსტიტუციურ კანონში, მაგრამ არის თემები, რომლებზეც მას პრინციპულად განსხვავებული მოსაზრებები აქვს.

გიორგი მარგველაშვილმა აღნიშნა, რომ ის პრეზიდენტის არჩევის წესის ცვლილებას არ ეთანხმება. „ვერ ვიტყვი, რომ პრეზიდენტის ერთი არჩევის წესი უფრო დემოკრატიულია, ვიდრე მეორე, მაგრამ ხალხს რომ ართმევ ამ უფლებას, არგუმენტი უნდა იყოს“, - განაცხადა მარგველაშვილმა და დასძინა, რომ პრეზიდენტის პირდაპირი წესით არჩევა არის პირველი პოლიტიკური ტრადიცია, რომელიც საქართველომ შექმნა და რომელშიც საქართველოს მოქალაქეები თავის თავს ხედავენ. „რატომ ვცვლით ამას? რატომ ვეუბნებით მოქალაქეებს, რომ თქვენ არ ხართ კვალიფიციური რომ აირჩიოთ? რატომ ვეუბნებით საქართველოს მოქალაქეებს, რომ თუ თქვენ მოგანდეთ არჩევანის უფლება, თქვენ აირჩევთ ოდიოზურ ფიგურებს“, - განაცხადა პრეზიდენტმა.

გიორგი მარგველაშვილი უშიშროების საბჭოს გაუქმების და პრეზიდენტის უფლებამოსილების საკითხსაც გამოეხმაურა. “წარმოიდგინეთ, პრემიერმინისტრი პრეზიდენტს ეუბნება, ომი გამოაცხადოს, მაგრამ პრეზიდენტს უფლება არ აქვს იკითხოს, ომს რატომ აცხადებს. პრეზიდენტმა პირდაპირ დოკუმენტს ხელი უნდა მოაწეროს, ომი კითხვის გარეშე უნდა გამოაცხადოს და პარლამენტს გადაუგზავნოს. რა საჭიროა ასეთი მთავარსადლის ფუნქცია, რომელსაც არც ეკითხებიან, ომი გამოსაცხადებელია თუ არა“, - განაცხადა პრეზიდენტმა.  მარგველაშვილის განცხადებით, ახალ კონსტიტუციაში პრეზიდენტი მთავარდსარდალი იქნება და ეს ტიტული შენარჩუნებულია, თუმცა არცერთი ფუნქცია, რომელიც პრეზიდენტმა, როგორც უმაღლესმა მთავარსარდალმა უნდა განახორციელოს, ფაქტობრივად, შენარჩუნებული არ არის.

პრეზიდენტმა ყურადღება უშიშროების საბჭოს გაუქმებაზეც გაამახვილა. „უქმდება უშიშროების საბჭო და იქმნება თავდაცვის საბჭო, რომელიც  ფუნქციონირებას მხოლოდ ომის შემთხვევაში იწყებს და პრეზიდენტი ამ პროცესში მონაწილეობს, რომელმაც მართვის შესახებ არაფერი იცის, სამხედრო ძალებთან არანაირი შეხება არ აქვს და არ იცის, რას ნიშნავს, სამხედრო ოპერაციის ჩატარება პოლიტიკურად. კონსტიტუციური ორგანო, რომელიც მოწოდებული იყო ქვეყნის სამხედრო თავდაცვის აღმშენებლობისთვის, საქართველოს კონსტიტუციას აღარ სჭირდება? ეს არის ჩემი ერთ-ერთი მთავარი პრობლემა და არა ის, რომ პრეზიდენტისთვის ჩამორთმეულია“, - დასძინა პრეზიდენტმა.

კონსტიტუციის ახალი პროექტის საჯარო განხილვა 5 მაისს დაიწყო. ის სულ 11 ქალაქში უნდა წარადგინონ. ბოლო შეხვედრა 15 მაისს დედაქალაქში გაიმართება.

საკონსტიტუციო ცვლილებების პროექტი პარლამენტში 1 მაისს დარეგისტრირდა. პროექტს "ქართული ოცნების" 108 დეპუტატი აწერს ხელს. საკონსტიტუციო კომისიამ ცვლილებების პროექტს - სამუშაო ვერსიის მუხლებს და ალტერნატიულ წინადადებებს მხარი 22 აპრილს დაუჭირა (43 მომხრე, 8 წინააღმდეგი). პროექტი ვენეციის კომისიას გადაეგზავნა. ცვლილებები პარლამენტის საშემოდგომო სესიაზე დამტკიცდება.