მოზარდის საქმეზე დაკავებული გამომძიებელი ყინწვისის სპეცოპერაციის გამოძიებაშიც ფიგურირებს

საქართველოს ახალგაზრდა იურისტთა ასოციაციის ინფორმაციით, მარიანა ჩოლოიანი, რომელიც ახლა 15 წლის ლუკა სირაძის საქმეზე იძულებით ჩვენების მიცემის ბრალდებით არის დაკავებული, ასევე ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში.

საქმის მასალების თანახმად, 2011 წლის 26 მაისს, ე. წ. ყინწვისის სპეცოპერაციის დროს დაკავებული ნიკოლოზ გოგუაძე თბილისის მთავარ სამმართველოში მოწმის სახით გამომძიებელმა, ჩოლოიანმა დაკითხა, რომელმაც მოგვიანებით მისი, როგორც ბრალდებულის დაკავებისა და პირადი ჩხრეკის ოქმიც შეადგინა. საიას დაცვის ქვეშ მყოფი ნიკოლოზ გოგუაძის განმარტებით, დაკითხვის პარალელურად გრძელდებოდა მის მიმართ არასათანადო მოპყრობა, კერძოდ, 2 სამოქალაქო ფორმაში ჩაცმულ პირს გოგუაძე პერიოდულად გაჰყავდა სხვა ოთახში, სადაც მის მიმართ ფიზიკური შეურაცხყოფა ხორციელდებოდა, შემდეგ კი ჩოლოიანთან ოთახში აბრუნებდნენ. მიუხედავად გოგუაძის მიმართ განხორციელებული არასათანადო მოპყრობისა, ჩოლოიანმა გოგუაძის ბრალდების საქმეში სასამართლოს წინაშე მოწმის სახით დაკითხვისას ამ უკანასკნელის ცემის ფაქტი არ დაადასტურა. ამავდროულად ჩოლოიანის მიერ შედგენილი ბრალდებულის დაკავებისა და პირადი ჩხრეკის ოქმის თანახმად, გოგუაძის დაკავების ფაქტობრივ დროდ მითითებულია 2011 წლის 27 მაისი, მიუხედავად იმისა, რომ რეალურად გოგუაძე სამართალდამცავებმა 2011 წლის 26 მაისს დაახლოებით დილის 11 საათისკენ დააკავეს.

გოგუაძის დაკავება 2011 წლის 26 მაისს და მის მიმართ არასათანადო მოპყრობის განხორციელება ამავდროულად დადგენილად მიიჩნია ადამიანის უფლებათა ევროპულმა სასამართლომ 2019 წლის 27 ივნისის გადაწყვეტილებით.

"საქართველოს დემოკრატიული ინიციატივის" წარმომადგენლის გიორგი მშვენიერაძის განცხადებით, "არის ძალიან ბევრი საქმე, რომელიც გვხვდება არასამთავრობო ორგანიზაციების ანგარიშებში, გვხვდება მედიაში, სადაც პოლიციელებს მოქალაქეები ადანაშაულებენ ფიზიკურ ძალადობაში, ზეწოლაში, ზემოქმედებაში ან მათი მდუმარე თანხმობით განხორციელებულ წამებაში, არაადამიანურ მოპყრობაში". 

ლუკა სირაძემ თვითმკვლელობა 12 დეკემბერს სცადა. შემთხვევას წინ უძღოდა „მწვანე სკოლაში“ მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა. ადვოკატის თქმით, მოზარდზე დაკითხვის დროს ფსიქოლოგიური ზეწოლა განხორციელდა. მოზარდის ჯანმრთელობის მდგომარეობა, ექიმების შეფასებით უკიდურესად მძიმე იყო. ექიმების თქმით, მოზარდს 17 დეკემბერს 20:10 საათზე გაუჩერდა გული. 

სახელმწიფო ინსპექტორის აპარატმა იმავე დღეს დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიამ ჩოლოიანი, ჩვენების მიცემის იძულების ბრალდებით დააკავა.