გიგი წერეთელი: იმედი მაქვს, ოქტომბრის საპარლამენტო არჩევნებს, ეუთოსა და საერთაშორისო მისიების წარმომადგენლები დააკვირდებიან

ეს არის პროცედურა, როდესაც ქვეყანა აპირებს, რომ მიიღოს საერთაშორისო დამკვირვებლები და არჩევნებამდე რამდენიმე თვით ადრე აკეთებს მოწვევას, რომლის შემდეგაც ხდება გადაწყვეტილების მიღება, - ამის შესახებ ეუთოს საპარლამენტო ასამბლეის პრეზიდენტმა, გიგი წერეთელმა ოქტომბრის საპარლამენტო არჩევნებზე, საერთაშორისო სადამკვირვებლო მისიის მოწვევის შესახებ საუბრისას განაცხადა.

„ეუთოს საპარლამენტო ასამბლეა კოორდინირებს ამ პროცესს და ეუთოს ადამიანის უფლებების და დემოკრატიული ინსტიტუტების ოფისთან ერთად ქმნის როგორც მოკლევადიან, ასევე გრძელვადიან სადამკვირვებლო მისიებს. პანდემიის გამო ბევრ ქვეყანაში არჩევნების გადადება გახდა აუცილებელი და ახლა პროგნოზირებისთვის რთული პერიოდია თუ რამდენად შეძლებენ საერთაშორისო დამკვირვებლები ქვეყანაში შემოსვლას. რაც შეეხება საქართველოს საკითხს, ჩვენ ქვეყანაში მიმდინარე პოლიტიკურ პროცესებზე ყოველთვის დიდი ინტერესია და ეს დამოკიდებულებაა ოქტომბრის საპარლამენტო არჩევნებზეც, რადგან იგი მომავალ პოლიტიკურ პროცესს და მნიშვნელოვანწილად, საქართველოსადმი დასავლეთის დამოკიდებულებას განსაზღვრავს.

ეუთოში გადაწყვეტილება კონკრეტული ვითარების შესაბამისად მოხდება, თუმცა სურვილი იმისა, რომ საარჩევნო პროცესების დაკვირვება მოხდეს, ეუთოს ნამდვილად აქვს. ეს საქართველოს ინტერესიც არის, რადგან თუ ეუთოს მისია არ ჩადის ქვეყანაში, ეს ნიშნავს, რომ იქ პროცესები დემოკრატიულად არ მიმდინარეობს. აქვე მნიშვნელოვანია იმ ვალდებულებების და რეკომენდაციების შესრულება, რომელიც ქართულმა მხარემ აიღო. ბოლო არჩევნებზე ძალიან ბევრი და მკაცრი რეკომენდაციები იყო, რიგი რეკომენდაციების კვლავ შესრულებას მოითხოვს, შესაბამისად, ესეც მნიშვნელოვანი პირობა იქნება იმისთვის, რომ საერთო შეფასების დოკუმენტში ეს პროცესი აისახოს“, - განაცხადა ეუთოს საპარლამენტო ასამბლეის პრეზიდენტმა.​

განცხადებას საქართველოს პარლამენტის პრესსამსახური ავრცელებს.