ოპოზიციური პარტიების განცხადებით, გიორგი რურუა ოპოზიციის ლიდერი არ არის

ჯო ბაიდენის საგარეო პოლიტიკის ერთ-ერთი მრჩეველის მაიკლ კარპენტერის განცხადებას, რომ გიორგი რურუა ოპოზიციიის ლიდერია და მმართველმა გუნდმა მისი პატიმრობიდან გათავისუფლების გადაწყვეტილება უნდა მიიღოს, ოპოზიციური პარტიების და „ქართული ოცნების“ ლიდერები გამოეხმაურნენ.

მაიკლ კარპენტერმა გიორგი რურუას შესახებ ეს განცხადება „ამერიკის ხმასთან“ ინტერვიუში გააკეთა.

ტელეკომანია „იმედის“ გადაცემა „ქრონიკასთან“ ფრაქცია „ნაციონალური მოძრაობის“ თავმჯდომარე რომან გოცირიძე აცხადებს, რომ გიორგი რურუა პოლიტიკურად აქტიური ფიგურაა. „ის არის დამოუკიდებელი მედიასაშუალების დამფუძნებელი. ის არის საპროტესტო აქციების ერთ-ერთი მონაწილე. მისი დაპატიმრების მოტივი იყო მისი პოლიტიკური აქტივობის შეწყვეტა“, - აცხადებს გოცირიძე.

„დემოკრატიული მოძრაობა - ერთიანი საქართველოს“ გენერალური მდივნის გიგლა ბარამიძის განმარტებით, კი მის პარტიას გამოკვეთილი ლიდერი ჰყავს და რურუას ამ კონტექსტში ვერ განიხილავს. „ნურავინ ნუ განგვისაზღვრავს ვინ არის ლიდერი და ვინ არა. ჩვენ კარგად გვაქვს განსაზღვრული ჩვენს პოლიტიკურ პარტიაში ვინ არის ლიდერი. თქვენ კარგად მოგეხსენებათ, ესაა პირველი პირი, ნინო ბურჯანაძე. დანარჩენი ახლა ოკეანის გაღმელი იქნება, ევროპელი, ჩრდილოელი თუ სამხრეთელი, როგორ ფიქრობს და როგორ აყალიბებს თავის აზრებს ეს მისი პრობლემაა“, - აცხადებს ბარამიძე.

„ქართული ოცნების“ ერთ-ერთი ლიდერი, ვიცე-სპიკერი გია ვოლსკი აცხადებს, რომ რურუა ოპოზიციის ლიდერად თავს თავად არ მიიჩნევს. „ოპოზიციის ლიდერს თავის თავს თვითონ არ უწოდებს გიორგი რურუა. საკვირველია ეგ თემა. იგივე პასუხს გავცემ, კარპენტერი მოგვიწოდებს, რომ უკანონობა ჩავიდინოთ და სასამართლოზე მოვახდინოთ ზეწოლა. მას ეს საუკეთესო გამოსავლად წარმოუდგენია“, - აღნიშნავს ვოლსკი.

„ქართული ოცნების“ წარმომადგენლის გიორგი კახიანის თქმით კი, მმართველი გუნდი სასამართლოს ფუნქციებში არ ჩაერევა. „რა გადაწყვეტილებას მიიღებს სასამართლო ეს ჩვენი საქმე არაა. სასამართლო არის დამოუკიდებელი და გიორგი რურუას მიმართ როგორ განაჩენს გამოიტანს ამ უწყების გადასაწყვეტია და ამაში ვერავინ ვერ ჩაერევა“, - განაცხადა კახიანმა.

გიორგი რურუა 2019 წლის 18 ნოემბერს დააკავეს. გამოძიება მას სსკ-ის 236-ე მუხლის მესამე და მეოთხე ნაწილებით გათვალისწინებულ დანაშაულს ედავება, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

11 ივნისს საქალაქო სასამართლომ „მთავარი არხის“ ერთ-ერთი დამფუძნებლი პატიმრობაში დატოვა.