მამუკა მდინარაძე: ოპოზიციის რადიკალური ნაწილი გადავიდა კრიმინალურ ოპოზიციაში

სანამ იქნებოდა საკონსტიტუციო ცვლილებებზე პირველი კენჭისყრა და გავრცელდა ფასილიტატორი ელჩების განცხადებები, მაშინ ვთქვი, რომ ოპოზიციას პირველ მოსმენაზე მოუწევდა მოსვლა და მხარდაჭერა, რადგან მაშინ საკმაოდ ხისტი იყო ფასილიტატორი ელჩების პოზიცია, - ამის შესახებ საპარლამენტო უმრავლესობის ლიდერმა, მამუკა მდინარაძემ „იმედის“ გადაცემა „ღია ეთერში“ განაცხადა.

მისი თქმით, მაშინ ოპოზიცია ამ მოწოდებას დაემორჩილა. „მერე კი პრაქტიკულად ისეთი რამ ჩაიდინეს, რომ ჩიხში შევიდნენ. მათ, როგორც ჩანს, ჩათვალეს, რომ ეს პიარულად, საზოგადოების თვალში იყო დათმობა, უკან დაიხიეს. ისინი ამდენი თვის განმავლობაში იტყუებოდნენ და ახლაც იტყუებიან, თითქოს ელჩების განცხადებაში წერია, რომ პოლიტპატიმრები უნდა გათავისუფლდნენ, თუმცა იქ წერია, რომ მართლმსაჯულება თავისუფალი უნდა იყოს პოლიტიკისგან. აქედან გამომდინარე, ეს ტყუილი გაამყარეს საზოგადოების გარკვეულ წრეებში. გამოუვიდათ, მათი აზრით, უკან დახევა და მეორე მოსმენაზე აღარ შემოვიდნენ და წავიდნენ ვა ბანკზე“, - აღნიშნა მამუკა მდინარაძემ.

მისი განმარტებით, ამ ქმედებამ მათგან შექმნა კრიმინალური ოპოზიცია. „ამას ვამბობთ ბევრი არგუმენტის გამო. მაგალითად, რურუაზე ჩამოკიდება და მისი ლიდერად გამოცხადება. ასევე, მათ წარსულზე ბევრი რომ არ ვილაპარაკოთ, დღესაც მათი მოქმედებები და მთლიანად მავნებლობის ხარისხი უკვე აშკარდა აჩენს, რომ მათ არ აქვთ არჩევნებში გამარჯვების იმედი. ყველაფერი ეს გვაძლევს იმის თქმის საფუძველს, რომ ოპოზიციის ეს რადიკალური ნაწილი გადავიდა კრიმინალურ ოპოზიციაში“, - განაცხადა მამუკა მდინარაძემ.