მარიამ ჯაში: მართვის მოწმობას თუკი ვაბარებინებთ განმეორებით, საატესტატოს გადაბარება რატომ არ შეიძლება

პარლამენტის განათლების, მეცნიერებისა და კულტურის კომიტეტის თავმჯდომარე მარიამ ჯაში აცხადებს, რომ მოსწავლეებს საატესტატო გამოცდების გადაბარების შანსი უნდა მიეცეთ. ინფორმაციას ipn ავრცელებს.

მარიამ ჯაშის ინიციატივის თანახმად, მოსწავლეებს, რომლებიც მე-12 კლასამდე წარმატებით სწავლობდნენ და საატესტატო გამოცდებში ბარიერი ვერ გადალახეს, იმავე წელს გამოცდის ხელახლა ჩაბარების შესაძლებლობა უნდა მიეცეთ. მისივე ინფორმაციით, ეს აპრობირებული მეთოდია ბევრ ქვეყანაში. 

მარიამ ჯაშის განცხადებით, მიუხედავად იმისა, რომ ამ ეტაპზე პოზიციები არ შეჯერებულა, მას განათლების მინისტრისგან აქვს პირობა, რომ ამ საკითხს აუცილებლად განიხილავენ.

„საუბარია განმეორებითი შანსის მიცემაზე, რადგან თუკი ჩვენ, მე-12 კლასამდე წარმატებით მიგვყავს ბავშვი და თუკი გვაქვს მეორე მხრივ არგუმენტი, რომ 10-ის ფარგლებში მიმატება-გამოკლების დონის ამოცანებს ვერ ხსნიან საატესტატო გამოცდაში, მაშინ, კითხვას ვსვამთ, როგორ მივიდა ბავშვი მე-12 კლასამდე წარმატებით?”, - განაცხადა მარიამ ჯაშმა.

დეპუტატის განმარტებით, მისი ინიციატივის თანახმად, საატესტატო გამოცდის გადაბარების შესაძლებლობა, აბსოლუტურად ყველა მოსწავლეს უნდა მიეცეს.

დეპუტატი საატესტატო გამოცდის გადაბარებას მართვის მოწმობის აღების პროცედურებს ადარებს.

„მე მარტივ შედარებას ვაკეთებ ხოლმე. თუკი მართვის მოწმობის შემთხვევაში, რომელიც სიცოცხლის რისკს, გაცილებით მაღალ რისკს უკავშირდება, ჩვენ ვაძლევთ ყოველკვირეულ რეჟიმში, პრაქტიკულად, მრავლობითი გადაბარების საშუალებას, ვფიქრობ, მოსწავლეები იმსახურებენ ხელმეორედ გადაბარების შესაძლებლობას“, - ამბობს მარიამ ჯაში.

დეპუტატის ინიციატივას განათლების მინისტრი ალექსანდრე ჯეჯელავა არ იზიარებს. 

„წინააღმდეგი ვარ ამ ინიციატივის. წიგნი თუ გადაშალა ადამიანმა, ის შეძლებს, რომ ბარიერიც გადალახოს. შესაბამისად ვფიქრობ, რომ არ მოგვცემს ეს რამე დადებით ეფექტს. მეორე მხრივ, მარიამის ინიციატივა ეხებოდა მეორე შანსის მიცემას, ტექნიკური ხარვეზის შემთხვევაში. ამას აუცილებელ განვიხილავთ მომავალი წლისთვის. თუ ასეთი შემთხვევა მოხდა, შევეცდებით, რომ ბავშვი არ დაზარალდეს“, - განაცხადა ჯეჯელავამ.