მამუკა მდინარაძე: პარტიების დაფინანსების ნაწილს საკამათოდ ვერავინ ხდის, ვინც კი ამ პროცესში ობიექტური დამკვირვებელია, ეს თემა პრაქტიკულად ჩახურულია

„დაფინანსების ნაწილს საკამათოდ ვერავინ ხდის, ვინც კი ამ პროცესში ობიექტური დამკვირვებელია, ეს თემა პრაქტიკულად ჩახურულია, რადგან სამართლებრივ კამათში ვერავინ შემოდის“, - ამის შესახებ ფრაქცია „ქართული ოცნების“ თავმჯდომარემ მამუკა მდინარაძემ ჟურნალისტებს განუცხადა, როდესაც პარტიების დაფინანსების წესთან დაკავშირებით კანონპროექტზე ევროკავშირის ელჩის, კარლ ჰარცელის განცხადებაზე ჰკითხეს.

უნდა იყოს თუ არა უფრო მკაცრი სანქცია საარჩევნო ცენზთან დაკავშირებით, მამუკა მდინარაძე აცხადებს, რომ ამასთან დაკავშირებით დისკუსია შესაძლებელია.

„კი ბატონო, გავხადოთ საკამათო. საჩქარო ეს იმიტომ არ არის, რომ ეხება წინასაარჩევნო 2-თვიან პერიოდს. ე.წ. პოლიტიკურ ლიდერის, ან არა ეგრეთწოდებულის ან ნებისმიერ ადამიანის, რომელიც არის უცხო ქვეყნის მოქალაქე, განაჩენია მის მიმართ დამდგარი და მონაწილეობს საარჩევნო კამპანიაში, მისთვის სანქცია თუ არის საკამათო, თქვენ შეგიძლიათ მითხრათ ვინმეს პოზიცია, უნდა იყოს ეს უზრუნველყოფილი შესაბამისი მოქმედებით და კანონმდებლობით თუ არა?

მაგალითად, რუსეთის დუმის დეპუტატმა რომ თქვას, რომ რომელიღაც პარტიის ლიდერია საქართველოში და ამ პარტიამაც დაუდასტუროს, ამ შემთხვევაში, ამის გამომრიცხავი არის თუ არა 2 000-ლარიანი ჯარიმა? ჩვენ ახლა იმაზე უნდა ვსაუბრობდეთ, აქამდე რატომ იყო ეს ხარვეზი საქართველოს კანონმდებლობაში, რატომ არ გამოვასწორეთ, მაგრამ დღეს ამას ვაღიარებთ, რომ აქამდე არსებული სანქცია იყო არარელევანტური.

დღეს ჩვენ მხოლოდ სანქციაზე ვსაუბრობთ. თუ ცენზი ირღვევა, სახელმწიფოს სანქცია უნდა იყოს იმგვარი და ადეკვატური, რომ გამორიცხოს უცხო ქვეყნის და მსჯავრდებული პირის მონაწილეობა საარჩევნო კამპანიაში", - განაცხადა მდინარაძემ.

კარლ ჰარცელმა ინიცირებულ კანონპროექტების შესახებ ისაუბრა და აღნიშნა, რომ რჩება შთაბეჭდილება, რომ საარჩევნო რეგისტრაციის შეჩერების შესახებ საკანონმდებლო ინიციატივა, ქვეყანაში არსებული ერთ-ერთი ყველაზე გავლენიანი პარტიისკენ არის მიმართული და მსგავსი კანონები ყოველთვის აჩენს კითხვის ნიშნებს. რაც შეეხება პარტიების დაფინანსების შესახებ საკანონმდებლო ინიციატივას, კარლ ჰარცელმა აღნიშნა, რომ იმ პარტიებისთვის დაფინანსების შეწყვეტაში, რომლებსაც საპარლამენტო მუშაობაში მონაწილეობის მიღება არ სურთ, არის გარკვეული ლოგიკა, თუმცა აქ უფრო ფართო განხილვას საჭიროებს ის საკითხი, თუ რას ნიშნავს პარტიები დემოკრატიაში და პლურალისტური გარემოს შექმნის პროცესში.