შემოსავლების სამსახური მზად არის ელიავას ბაზრობის ხანძრით დაზარალებულებს ზარალი ჩამოაწეროს

ფინანსთა სამინისტროს შემოსავლების სამსახური მზად არის ელიავას ბაზრობის ხანძრით დაზარალებულებს ზარალი ჩამოაწეროს. ამის შესახებ შემოსავლების სამსახურის მომსახურების დეპარტამენტის უფროსის მოადგილემ ლევან დგებუაძემ განაცხადა. ინფორმაციას 1tv.ge ავრცელებს.

„ფინანსთა სამინისტროს შემოსავლების სამსახური ვართ გამოცხადებული, რათა მოვახდინოთ ჩვენი კომპეტენციის ფარგლებში რეაგირება. ჩვენ მზად ვართ, მოხდეს ზარალის ჩამოწერა, აღნიშნული მოვაჭრეებს ეს მისცემს საშუალებას, რომ დამატებითი პრობლემები არ წარმოიშვას. მოვახდენთ იდენტიფიცირებას, ვის რა ზიანი მიაყენა ხანძარმა და იქნება განხორციელებული ყველა პროცედურა, რომ მოხდეს ხანძრით მიყენებული ზარალის და შესაბამისი მატერიალური ფასეულობების ჩამოწერა. დილიდან დავიწყებთ მუშაობას, მოვახდენთ იდენტიფიცირებას და დავადგენთ ზუსტ სიას, ვის მიადგა ზარალი", -  აცხადებს დგებუაძე.

შინაგან საქმეთა სამინისტრომ, ელიავას ბაზრობაზე მომხდარ ხანძართან დაკავშირებით გამოძიება სისხლის სამართლის კოდექსის 187-ე მუხლით დაიწყო.

ელიავას ბაზრობაზე გაჩენილი ხანძრის ლოკალიზების შემდეგ ადგილზე მივიდნენ თბილისის მერიის წარმომადგენლები, ასევე დიდუბის რაიონის გამგებელი ირმა ზავრადაშვილი. ადგილზე მივიდა "ნაციონალური მოძრაობის" თბილისის მერობის კანდიდატი ზაალ უდუმაშვილიც. უდუმაშვილი და ზავრადაშვილი ერთმანეთს სიტყვიერად დაუპირისპირდნენ. 

ელიავას ბაზრობაზე იმყოფებიან მაღაზიის მეპატრონეებიც, ისინი ეჭვობენ, რომ ხანძარი ხელოვნურად გააჩინეს.

ელიავას ბაზრობაზე რამდენიმე საათის წინ ძლიერი ხანძარი იყო. იწვოდა 2500 კვადრატულ მეტრამდე ტერიტორია. თავდაპირველად ხანძარი ავტონაწილების მაღაზიაში გაჩნდა. ხანძრის ჩასაქრობად მობილიზებული იყო 150-მდე მეხანძრე და 30-მდე სახანძრო-სამაშველო მანქანა. ხანძარი ამ დროისთვის ლოკალიზებულია და მიმდინარეობს მცირე კერების ჩაქრობა.