არასამთავრობოები მმართველი გუნდის და ოპოზიციის შეხვედრაზე განცხადებას ავრცელებენ

არასამთავრობო ორგანიზაციების საკონსტიტუციო რეფორმის შესახებ პოლიტიკური პარტიების კონსულტაციებთან დაკავშირებით განცხადებას ავრცელებენ. განცხადების მიხედვით, მმართველი და ოპოზიციური პარტიების მონაწილეობით დღეს დაგეგმილია კონსულტაციები საკონსტიტუციო რეფორმასთან დაკავშირებით. დღევანდელი კონსულტაცია იძლევა ჩიხური სიტუაციიდან გამოსვლის შესაძლებლობას, რაც მისასალმებელია.

"მიგვაჩნია, რომ საკვანძო საკითხს კონსტიტუციის პროექტში პროპორციულ საარჩევნო სისტემაზე 2020 წელს გადასვლა წარმოადგენს. პროპორციულ სააარჩვნო სისტემაზე გადასვლამ მხარდაჭერა მოიპოვა საკონსტიტუციო კომისიის ფომატში, შედგა სრული კონსენსუსი ოპოზიციურ პოლიტიკურ პარტიებში და დადებითად შეფასდა საერთაშორისო ორგანიზაციებისა (მათ შორის ვენეციის კომისიის) და საქართველოს პარტნიორი სახელმწიფოების მიერ. მივიჩნევთ, რომ პირველ რიგში აუცილებელია კონსენსუსი შედგეს საპარლამენტო საარჩევნო სისტემის გარშემო. შეთანხმების მიუღწევლობისა და არასამართლიანი საარჩევნო სისტემის შენარჩუნების პირობებში, მივიღებთ ერთი პარტიის მიერ მიღებულ კონსტიტუციას, რაც გააღვივებს პოლიტიკურ დაპირისპირებას, გაზრდის დაძაბულობას პოლიტიკურ პარტიებს შორის, დააზიანებს ქვეყნის რეპუტაციას, შეაფერხებს ქვეყნის სტაბილურ განითარებასა და საქართველოს ევროატლანტიკურ სტრუქტურებთან დაახლოებას,"- ნათქვამია განცხადებაში. 

არასამთავრობო სექტორი მხარეებს მოუწოდებს, არ იხელმძღვანელონ ვიწრო პარტიული პოზიციებიდან გამომდინარე და გადაწყვეტილება მიიღონ ქვეყნის ინტერესების შესაბამისად. "ვფიქრობთ, რომ განსაკუთრებული პასუხისმგებლობა ამ პროცესის პოზიტიურად დასრულებაზე აკისრია მმართველ პოლიტიკურ პარტიას. ვიმედოვნებთ, რომ მმართველი პოლიტიკური პარტია გადადგამს კონკრეტულ ნაბიჯებს კონსენსუსის მისაღწევად."- წერია განცხადებაში, რომელსაც 5 არასამთავრობო ორგანიზაცია აწერს ხელს. 

საერთაშოისო გამჭირვალობა -საქართველო;  სამართლიანი არჩევნების და დეოკრატიის საერთაშორისო საზოგადოება; სამოქალაქო განვითარების სააგენტო; ლიბერალური აკადემია თბილისი;  ინფორმაციის თავისუფლების განვითარების ინსტიტუტი. 

მმართველი გუნდისა და ოპოზიციის შეხვედრა პარლამენტში დღეს გაიმართება. შეხვედრა პარლამენტის თბილისის სასახლეში, დღეს, 17:00 საათზე დაიწყება. 

საპარლამენტო უმრავლესობის ორგანიზებით, პოლიტიკურ პარტიებს შორის დაგეგმილ შეხვედრაზე საკონსტიტუციო რეფორმის საკითხი განიხილება. შეხვედრას პარლამენტის თავმჯდომარე ირაკლი კობახიძე არ დაესწრება. მას საპარლამენტო უმრავლესობის ლიდერი არჩილ თალაკვაძე უხელმძღვანელებს.