2018 წელს საქართველოს ბელარუსის პრეზიდენტი ეწვევა

მინსკში ბელარუსის პრეზიდენტის - ალექსანდრე ლუკაშენკოს და საქართველოს პარლამენტის თავმჯდომარის - ირაკლი კობახიძის შეხვედრის შემდეგ ცნობილი გახდა, რომ მომავალი წლის დასაწყისში ლუკაშენკო თბილისს ეწვევა. ამის შესახებ თავად ალექსანდრე ლუკაშენკომ განაცხადა.

პირველად, ოფიციალური ვიზიტით, ბელარუსის პრეზიდენტი საქართველოს 2015 წლის აპრილში სტუმრობდა.

კობახიძესთან შეხვედრაზე ლუკაშენკო შეეხო ორმხრივ ურთიერთობებსაც. როგორც ბელარუსის პრეზიდენტი აცხადებს, ქვეყნებს შორის ტვირთბრუნვა 200 მილიონს აჭარბებს. ლუკაშენკო ამბობს, რომ საქართველო ბელარუსის მხარდამჭერი იყო ჯერ კიდევ სააკაშვილის პრეზიდენტობის პერიოდში, იმის მიუხედავად, რომ მისი პოლიტიკური ვექტორი დასავლეთისკენ იყო მიმართული და ეს პოლიტიკა გრძელდება ახლაც. ბელარუსის პრეზიდენტმა საქართველოს მადლობა გადაუხადა. გარდა ამისა, როგორც ლუკაშენკო აცხადებს, საქართველო ბელარუსს მედიკამენტებით დაეხმარა მაშინ, როცა ქვეყანას ეს ყველაზე მეტად ესაჭიროებოდა და გვერდით დაუდგა საქართველოს მაშინ, როცა საქართველო ხანძრებს ებრძოდა. ლუკაშენკო მიიჩნევს, რომ საპარლამენტო დონეზე ქვეყნებს შორის ურთიერთობა მნიშვნელოვანია. ის ამბობს, რომ სპეციალური ტექნიკა ბელარუსს ტრაქტორების სახით საქართველოსთვისაც დაუმზადებია. ასევე პრეზიდენტი მზადაა ქართულ მხარეს გააცნოს სოფლის მეურნეობის დარგში მიმდინარე სიახლეები და საქართველოს მხრიდან სურვილის შემთხვევაში სამხედრო პოტენციალიც გააცნოს. 

თავის მხრივ, ირაკლი კობახიძემ მადლობა გადაუხადა პრეზიდენტ ლუკაშენკოს ჩვენი ქვეყნის ტერიტორიული მთლიანობისა და სუვერენიტეტისთვის გამოხატული მხარდაჭერისთვის.

საქართველოს პარლამენტის თავმჯდომარე ირაკლი კობახიძე, დელეგაციასთან ერთად დღეს ბელარუსის რესპუბლიკას ეწვია. ვიზიტის ფარგლებში პირველ შეხვედრა კობახიძემ ბელარუსის რესპუბლიკის პრეზიდენტ ალექსანდრ ლუკაშენკოსთან გამართა. 

საქართველოს პარლამენტის თავმჯდომარე, დელეგაციასთან ერთად, ეროვნული კრების რესპუბლიკის საბჭოს თავმჯდომარე მიხაილ მიასნიკოვიჩს შეხვდება, რის შემდეგაც, პრესისთვის ერთობლივი განცხადება გაკეთდება. ვიზიტის ფარგლებში, საქართველოს პარლამენტის თავმჯდომარე და ეროვნული კრების რესპუბლიკის საბჭოს თავმჯდომარე ქვეყნების უმაღლეს საკანონმდებლო ორგანოებს შორის თანამშრომლობის შესახებ ერთობლივ განცხადებას მოაწერენ ხელს. 

ვიზიტის ფარგლებში ირაკლი კობახიძე შეხვდება ბელარუსის სახელმწიფო უნივერსიტეტის პროფესორ-მასწავლებლებს და სტუდენტებსაც.