განათლების მინისტრი: უნივერსიტეტები არაგეგმურად შემოწმდება

"უმაღლესი განათლების ხარისხის ამაღლების ფარგლებში უნივერსიტეტები არაგეგმურად შემოწმდება", - ეს განცხადება განათლების მინისტრმა მიხეილ ჩხენკელმა განათლების, მეცნიერებისა და კულტურის, სპორტისა და ახალგაზრდობის საქმეთა და ჯანმრთელობის დაცვისა და სოციალურ საკითხთა კომიტეტების გაერთიანებულ სხდომაზე გააკეთა.

„უმაღლესი განათლების მაღალი ხარისხის უზრუნველსაყოფად გადაიდგმება ქმედითი ნაბიჯები. მოხდება უნივერსიტეტების არაგეგმური შემოწმება. ავტორიზაციის სტანდარტებისადმი შეუსაბამობა, მათთვის სტუდენტთა მიღების შეჩერების საბაბი გახდება. მსოფლიო ბანკის მხარდაჭერით, შემუშავდება უმაღლესი განათლების დაფინანსების ახალი, უფრო ეფექტური მოდელი. ეს უკვე მიმდინარე პროცესია“, - განაცხადა ჩხენკელმა.

მისი თქმით, უნივერსიტეტების არაგეგმიური შემოწმებისას სტანდარტებთან შეუსაბამობა სტუდენტთა მიღების შეჩერების საბაბი გახდება. მინისტრის განცხადებით, ავტორიზაციის სტანდარტების შეუსაბამობა, უმაღლესებისთვის სტუდენტთა მიღების შეჩერების საბაბი გახდება.

"ამოქმედდება ევროპის საბჭოს უმაღლესი განათლების სტანდარტებთან თავსებადი მოდელი. მსოფლიო ბანკის მხარდაჭერით კი, შემუშავდება უმაღლესი განათლების დაფინანსების ახალი, გაცილებით ეფექტური მექანიზმი. დიდი ყურადღება დაეთმობა დისტანციური სწავლების დანერგვას, რაც გულისხმობს როგორც უცხოელი პროფესორების რესურსის გამოყენებას, ასევე შესაძლებლობას საზღვარგარეთ ქართველმა პროფესორებმაც წაიკითხონ ონლაინ ლექციები,"- განაცხადა ჩხენკელმა. 

საზღვარგარეთის წამყვან უნივერსიტეტებთან თანამშრომლობის კუთხით, მინისტრმა ხაზი გაუსვა ფონდი „ქართუსა“ და მიუნხენის ტექნიკური უნივერსიტეტის მხარდაჭერით მიმდინარე პროექტს, რომლის შედეგად, ქუთაისში უმაღლესი საერთაშორისო სტანდარტების შესაბამისი ტექნოლოგიური უნივერსიტეტი გაიხსნება.

დღეს მინისტრები დეპუტატების კითხვებს დილიდან კომიტეტის ფორმატში პასუხობენ. მთავრობისა და სამთავრობო პროგრამისთვის ნდობის გამოცხადების საკითხი რიგგარეშე სესიაზე ხვალ გავა. 

7 დეკემბერს მთავრობის სტრუქტურული ცვლილებების პროექტი პარლამენტმა მესამე მოსმენით მიიღო.