მაკა ბოჭორიშვილი: სტამბოლის დეკლარაცია აჯამებს ჩვენს შეხვედრას. თურქეთიც და აზერბაიჯანით საქართველოს ტერიტორიულ მთლიანობას უჭერენ მხარს, საქართველოს სუვერენიტეტს პატივს სცემენ, ეს საკითხებიც იყო აღნიშნული დეკლარაციაში

ვიმსჯელეთ იმ სამომავლო გეგმებზე, თუ როგორ შეიძლება, განვავითაროთ თანამშრომლობა სხვადასხვა მიმართულებით, რათა სამი ქვეყნის როლი, განსაკუთრებით დაკავშირებადების კონტექსტში უკეთ იყოს წარმოჩენილი, - განუცხადა ჟურნალისტებს საქართველოს ვიცე-პრემიერმა, საქართველოს საგარეო საქმეთა მინისტრმა, მაკა ბოჭორიშვილმა მინისტერიალის ფარგლებში განხილული საკითხების კომენტირებისას.

მისივე თქმით, საქართველოს, თურქეთსა და აზერბაიჯანს შორის სამმხრივი ფორმატი მნიშვნელოვანია.

„არსებობს მთელი რიგი იდეები, მთელი რიგი პროექტები, რასაც სჭირდება ჩვენი ყოველდღიური მუშაობა, თანამშრომლობა და შეიძლება ითქვას, რომ საკმაოდ პოზიტიური დინამიკით და პოზიტიურად ჩატარდა შეხვედრა.

სტამბოლის დეკლარაცია აჯამებს ჩვენს შეხვედრას. ეხება ყველა იმ მნიშვნელოვან თემას, რაც ჩვენ განვიხილეთ, უსაფრთხოების თემებიდან დაწყებული. თურქეთიც და აზერბაიჯანით საქართველოს ტერიტორიულ მთლიანობას უჭერენ მხარს, საქართველოს სუვერენიტეტს პატივს სცემენ, ეს საკითხებიც იყო აღნიშნული დეკლარაციაში.

ჩვენ ასევე შევეხეთ სხვადასხვა თემას, რაც ეხება რეგიონულ განვითარებას, უფრო ფართო რეგიონს, ზოგადად მდგომარეობას ახლო აღმოსავლეთის რეგიონში. ასევე, რუსეთ-უკრაინის კონფლიქტს. ეს საკითხები ყველაფერი არის ასახული სტამბოლის დეკლარაციაში.

ასევე, საუბარია ინფრასტრუქტურულ პროექტებზე, რაც სამ ქვეყანას შორის არის განხორციელებული და სამომავლო გეგმებზე, რაც ასევე ძალიან მნიშვნელოვანია. რაც მთავარია, დავაფიქსირეთ კიდევ ერთხელ ჩვენი საერთო ხედვა და საერთო მისწრაფება, რომ ეს ურთიერთობები კიდევ უფრო გაძლიერდეს და უფრო მეტად შედეგზე ორიენტირებული იყოს“, - განაცხადა ბოჭორიშვილმა.

სტამბოლში დღეს საქართველოს, თურქეთისა და აზერბაიჯანის საგარეო საქმეთა მინისტრების რიგით მეათე სამმხრივი შეხვედრა გაიმართა. სამმხრივი მინისტერიალის ფარგლებში, ხელი მოეწერა საგარეო საქმეთა მინისტრების ერთობლივ განცხადებას - სტამბოლის დეკლარაციას.