თორნიკე ფაღავა: ძირითადი მიზეზი, რის გამოც საქართველოსა და ევროკავშირს შორის უხერხულობები არსებობს, არის ის, რომ რუსეთ-უკრაინის ომის კონტექსტში ვერ მოხდა ევროკავშირისა და საქართველოს საგარეო პოლიტიკების ჰარმონიზაცია

ერთი მხრივ, ევრობიუროკრატები პოლიტიკური თვალსაზრისით გვეპაექრებიან და ცდილობენ, რომ დაგვიმორჩილონ. მეორე მხრივ, რაც შეეხება გეოეკონომიკურ პროექტებს, დარწმუნებულები არიან, რომ ჩვენ ამ პროექტებში მონაწილეობას მივიღებთ და აქედან გამომდინარე, ცდილობენ, პოლიტიკურ პროცესებში გვეპაექრონ, - განაცხადა ევროპასთან ინტეგრაციის საპარლამენტო კომიტეტის თავმჯდომარის მოადგილე თორნიკე ფაღავამ გადაცემაში „დღის ქრონიკა“.

როგორც მან აღნიშნა, საქართველოსა და ევროკავშირს შორის გარკვეული ტიპის უხერხულობები რუსეთ-უკრაინის ომის დაწყების შემდეგ დაიწყო.

„ძირითადი მიზეზი, რის გამოც საქართველოსა და ევროკავშირს შორის უხერხულობები არსებობს, არის ის, რომ რუსეთ-უკრაინის ომის კონტექსტში ვერ მოხდა ევროკავშირისა და საქართველოს საგარეო პოლიტიკების ჰარმონიზაცია, ეს არის ძირითადი განმსაზღვრელი, რის გამოც ჩვენ შორის ურთიერთობები გარკვეულწილად გართულდა და ეს ჩვენი მხრიდან გადახედვას არ ექვემდებარება. ჩვენ არ ვაპირებთ არავის ხათრით ჩვენი სახელმწიფო ინტერესების უარყოფას.

ევრობიუროკრატები დარწმუნებულები არიან, რომ როდესაც ჩვენი ქვეყნისა და ჩვენი საზოგადოების ეროვნულ ინტერესებზე მიდგება საქმე, რა თქმა უნდა, ქართველი მაღალი პოლიტიკური თანამდებობის პირები გადაწყვეტილებას მიიღებენ ჩვენი ეროვნული ინტერესების გათვალისწინებით. მიუხედავად იმისა, რომ ისინი ძალიან არაგულწრფელად ექცევიან ქართველ საზოგადოებას, ჩვენ მაინც ვითანამშრომლებთ მათთან დაკავშირებადობის თვალსაზრისით. აქედან გამომდინარე, ისინი დარწმუნებულები არიან, რომ ჩვენ პრაგმატულ ნაბიჯებს გადავდგამთ“, - აღნიშნა ფაღავამ.