ლუკ კოფი: ნატოში გასაწევრიანებლად საქართველოს MAP-ი არ სჭირდება

საერთაშორისო პოლიტიკის მიმომხილველის ლუკ კოფის განცხადებით, არც ერთ სხვა ასპირანტ ქვეყანას არ აქვს იმდენი ინიციატივა ნატოსთან, რამდენიც საქართველოს. ამის შესახებ მიმომხილველმა „ამერიკის ხმასთან“ ინტერვიუს დროს განაცხადა.

მისი განცხადებით, ნატოში გასაწევრიანებლად საქართველოს MAP-ი არ სჭირდება. ლუკ კოფის თქმით, უკვე რამდენიმე წელია, საქართველო აჩვენებს, რომ ის ამერიკის შეერთებული შტატებისთვის სანდო პარტნიორია.

„ის მონაწილეობს ავღანეთის მისიაში, მანამდე მონაწილეობდა ერაყის მისიაში, მას წვლილი შეაქვს ტრანს-ატლანტიკურ უსაფრთხოებაში. საქართველო ასრულებს ნატოს მოთხოვნას თავდაცვის სფეროს დაფინანსების შესახებ და საქართველო მდებარეობს გეოსტრატეგიულად მნიშვნელოვან რეგიონში.

ბევრი ჩემი კოლეგის მსგავსად, ვინც ტრანსატლანტიკურ საკითხებზე მუშაობს, საპრეზიდენტო არჩევნების დროს ვღელავდით იმ ზოგიერთი განცხადების გამო, რომელიც პრეზიდენტმა რუსეთზე და ნატოზე გააკეთა. მაგრამ უნდა ვაღიარო, რომ სასიამოვნოდ გაოცებული დამტოვა ადმინისტრაციის გადაწყვეტილებებმა. აქ გამოვყოფდი საქართველოსთვის „ჯაველინების“ მიყიდვის გადაწყვეტილებას, რასაც მე უკვე რამდენიმე წელია, ვემხრობი. ამ იდეას მხარდამჭერები ჰყავდა კონგრესში, როგორც რესპუბლიკელების, ასევე დემოკრატების მხრიდან“, – განაცხადა ლუკ კოფიმ.

მისივე თქმით, ქართველებმა უნდა გააცნობიერონ, რომ სწორ გზაზე არიან. მისივე განცხადებით, სანამ MAP-ის საკითხი არსებობს, რუსეთს შეუძლია, ის პროპაგანდისთვის გამოიყენოს.

„ჩემი აზრით, არ იყო ჯანსაღი წევრობის სამოქმედო გეგმასთან – MAP-თან დაკავშირებული მოლოდინები. ახლა ნატო-ს ყოველი სამიტის წინ ქართველებს MAP-ის მოლოდინი აქვთ. ბევრი ქვეყანა ნატო-ს MAP-ის გარეშე შეუერთდა. სანამ MAP-ის საკითხი არსებობს, რუსეთს შეუძლია ის პროპაგანდისთვის გამოიყენოს.

ბრიუსელის სამიტზე საქართველო MAP-ს ვერ მიიღებს, იმიტომ რომ ალიანსის ზოგიერთი წევრი თავს კომფორტულად არ გრძნობს. თუ იქნება MAP-ის მიღების მოლოდინი, რაც ბრიუსელში არ მოხდება, მერე ამას რუსეთი პროპაგანდისთვის გამოიყენებს. ნატო-ში გაწევრიანებას MAP-ი არ ჭირდება. თქვენ MAP-ი არ გჭირდებათ“, – აღნიშნა მიმომხილველმა.