ნიკა გვარამია დღეს გამოკითხვაზე არ მიდის

"რუსთავი 2"-ის გენერალური დირექტორი ნიკა გვარამია საგამოძიებო უწყების მიერ მის გამოკითხვაზე დაბარებას გამოეხმაურა. გვარამია ამბობს, რომ ის დღეს საგამოძიებო უწყებაში არ მივა. "რუსთავი 2"-ის გენერალური დირექტორი მის დაკითხვას სასამართლოს მეშვეობით ითხოვს.

ნიკა გვარამია, მისი დაკავების შემთხვევაში, ტელეკომპანიის გენერალური დირექტორის თანამდებობას ზაალ უდუმაშვილს აბარებს. "რუსთავი 2"-ის გენერალურმა დირექტორმა განაცხადა, რომ უდუმაშვილზე მინდობილობა დაწერილი აქვს. მისივე თქმით, ამ დღეებში გადაწყდება "რუსთავი 2"-ის ბედი. "ამიტომ რუსთავი 2-ის თანამშრომელები კვირას სამის ნახევარზე ვიკრიბებით თბილისში, პარლამენტის შენობასთან და მოვითხოვთ ჩვენი კანონიერი უფლებების დაცვას", - განაცხადა ნიკა გვარამიამ.

რაც შეეხება მამუკა ახვლედიანს, ნიკა გვარამია ამბობს, რომ ჩანაწერი მისი გაკეთებულია. "ეს არის საუბარი სამ პირს შორის, მე შეგნებულად არ ვასახელებ მესამე პირის ვინაობას, რადგან ის ხელისუფლებასთან არის დაკავშირებული. ამ ჩანაწერში თანხასთან დაკავშირებით ვესაუბრები არა ახვლედიანს, არამედ მესამე პირს, საუბარია "რუსთავი 2"-ის ვალებზე. ეს მესამე პირი არის ხელისუფლებასთან დაახლოებული. ის მელაპარაკება, როგორ აპირებს ხელისუფლება "რუსთავი 2"-ის განადგურებას, მათ შორის ვალების მეშვეობით, რომელიც რუსთავი ორს აქვს", - განაცხადა ნიკა გვარამიამ.

რაც შეეხება ახვლედიანთან საუბარს, "რუსთავი 2"-ის გენერალური დირექტორი ამბობს, რომ მან მამუკა ახვლედიანს მისი უსაფრთხოების დაცვა შესთავაზა. "მე მას ვუთხარი, რომ თუკი ახვლედიანისთვის ცნობილია კორუფციული გარიგების შესახებ, დავიცავდით მის უსაფრთხოებას, ჩვენ როგორც მედია. მაგრამ ახვლედიანმა თქვა, რომ მისთვის არაფერია ცნობილი და მხოლოდ სასამართლოში შექმნილ მდგომარეობაზე მელაპარაკა. ეს საუბარი არის დამონტაჟებული. შსს-ს ვუთხარი, რომ დაეკითხა მოწმეები, მაგრამ არ დაკითხა. ხელისუფლებამ დაამყარა კიდევ ერთი რეკორდი. მან მოსპო დამოუკიდებელი და მიუკერძოებელი ექსპერტიზის შესაძლებლობა. პროკურატურა, სასამართლო და უკვე ექსპერტიზა არის ხელისუფლების ხელში", - აღნიშნა გვარამიამ.

რას შეეხება მამუკა ახვლედიანს, საქალაქო სასამართლოს ყოფილი თავმჯდომარე ტელეკომპანია "იმედთან" საუბარში აცხადებს, რომ ამ დროისთვის მას არცერთი საგამოძიებო უწყება არ დაკავშირებია და გამოკითხვაზე დაბარებული არ არის.

"რუსთავი 2"-ის გენერალური დირექტორი საგამოძიებო ორგანოში დღეს 18:00 საათზეა დაბარებული.