სახალხო დამცველმა თამარ მეარაყიშვილი ადამიანის უფლებათა პრიზებზე წარადგინა

საქართველოს სახალხო დამცველმა, ნინო ლომჯარიამ კონფლიქტით დაზარალებული მოსახლეობის უფლებების დაცვის მიმართულებით თავდაუზოგავი საქმიანობისთვის ახალგორელი აქტივისტი თამარ მეარაყიშვილი ადამიანის უფლებათა სფეროში გაეროს პრიზზე და ვაცლავ ჰაველის ადამიანის უფლებათა პრიზზე წარადგინა.

როგორც სახალხო დამცველის მიერ გავრცელებულ ინფორმაციაში წერია, აქტივისტი და ბლოგერი თამარ მეარაყიშვილი  საკუთარი სიცოცხლის, უსაფრთხოების და ჯანმრთელობის რისკის ფასად ასაჯაროებს ოკუპირებულ ახალგორში შექმნილ მძიმე მდგომარეობას და დეფაქტო ხელისუფლების მიერ ადგილობრივი მოსახლეობის უფლებათა დარღვევის შემთხვევებს.

როგორც სახალხო დამცველის განცხადებაშია ნათქვამი, 2017 წელს მეარაყიშვილი ორჯერ უკანონოდ დააკავეს. ამჟამად კი მის წინააღმდეგ სისხლის სამართლის ორი საქმეა აღძრული. მას ჩამორთმეული აქვს პირადობის დამადასტურებელი დოკუმენტები და ჯანმრთელობის რთული მდგომარეობის მიუხედავად, არ შეუძლია საქართველოს კონტროლირებად ტერიტორიაზე გადმოსვლა და მკურნალობა.

სახალხო დამცველი მიიჩნევს, რომ თამარ მეარაყიშვილის წინააღმდეგ მიმართული პროცესი არის დეფაქტო ხელისუფლების მიერ მისი გაჩუმებისა და მისი მშობლიური ქალაქის დატოვების იძულების მცდელობა.

სახალხო დამცველი მოუწოდებს საქართველოს ხელისუფლებას, მაქსიმალური ყურადღება გამოიჩინოს თამარ მეარაყიშვილის მიმართ, მისი და მისი ოჯახის უფლებრივი და სოციალური მდგომარეობის შემსუბუქების თვალსაზრისით.

„გაეროსა და ვაცლავ ჰაველის ადამიანის უფლებათა პრიზებზე წარდგენით, სახალხო დამცველი მადლობას უხდის თამარ მეარაყიშვილს კონფლიქტით დაზარალებული მოსახლეობის უფლებების დაცვაში შეტანილი წვლილისთვის და მიიჩნევს, რომ ის მისაბაძი მაგალითია ყველა აქტივისტისა და ადამიანის უფლებების დამცველისთვის“, – აცხადებს სახალხო დამცველი.