საქართველოს გზებზე საგანგებო სიტუაციის გამოცხადებას მოითხოვენ

„საქართველოს ტრანსპორტისა და გზების ასოციაციის“ ხელმძღვანელი დავით მესხიშვილი სოციალურ ქსელში განცხადებას ავრცელებს.

მესხიშვილი გზებზე საგანგებო მდგომარეობის გამოცხადებას მოითხოვს.

"მხოლოდ 3 დღეში, ავტოსაგზაო შემთხვევებში დაიღუპა 11 და დაშავდა-დასახიჩრდა 30-ზე მეტი ადამიანი. ტრანსპორტისა და გზების ასოციაცია ვიზიარებთ გარდაცვლილთა ოჯახების მწუხარებას, რომელთა შორის ერთ-ერთი ამერიკის საელჩოს თანამშრომელია (ჩვენი ინფორმაციით). კვლავ მოვუწოდებთ ხელისუფლებას გადადგას ქმედითი ნაბიჯები.

მივმართავთ საქართველოს მთავრობას რეკომენდაციებით, სადაც გათვალისწინებულია აუდიტის სამსახურის დასკვნაც, რომლის უმეტეს ნაწილსაც ჩვენი ასოციაცია ეთანხმება. წარმოგიდგენთ დაუყოვნებლივ შესასრულებელ რეკომენდაციებს:

1. ტრანსპორტის სექტორი გაბნეულია სხვადასხვა სამინისტროში (შსს, ეკონომიკის, სოფლის მეურნეობისა და გარემოს დაცვის და ინფრასტრუქტურის სამინისტროები), რის გამოც უწყებებს შორის კომუნიკაცია არის გართულებული და არაფექტიანი. ეს პრობლემა, განსაკუთრებით მწვავედ აისახება საგზაო უსაფრთხოების მიმართულებაზე.

2.შინაგან საქმეთა სამინისტროს მიერ არ ხდება საგზაო-სატრანსპორტო შემთხვევის აღრიცხვის ბარათის სრულყოფილად შევსება - რაც შემთხვევის გამომწვევი მიზეზისა და ადგილმდებარეობის არასათანადოდ აღრიცხვაში მდგომარეობს. 

3. დღემდე ვერ მოხერხდა „შავი წერტილების“-ს ზუსტი ადგილმდებარეობის განსაზღვრა. თვითონ ტერმინიც არ არის დამკვიდრებული მოქმედ კანონმდებლობაში. შეგახსენებთ, რომ "შავი წერტილი" წარმოადგენს გზის ისეთ მონაკვეთს, სადაც ავტოსატრანსპორტო შემთხვევები ხშირად ფიქსირდება. გზის აღნიშნულ მონაკვეთებზე წარმოდგენილი პრობლემები ხშირად მსგავსია და მათი მოგვარება შესაძლებელია შესაბამისი ჩარევით. მსოფლიო ბანკის მიხედვით, „შავი წერტილისთვის“ დამახასიათებელი 2 გარემოებაა:
მომეტებული რისკის შემცველი ადგილი, განგრძობითი შეჯახებების ისტორიით, რომელიც არ წარმოადგენს შემთხვევით სტატისტიკურ ცდომილებას.

ადგილი, რომელიც ხასიათდება მსგავსი ტიპის შეჯახებების ტენდენციით და გამოწვეულია ერთი ან რამდენიმე მიზეზით, რომლის მოგვარებაც შესაძლებელია შეჯახების გამომწვევი მიზეზის გამოსწორებით.
2015 წელს პრობლემურ მონაკვეთებზე მომხდარ ავტოსაგზაო შემთხვევებზე ფატალური შემთხვევების 38% მოდის, რაც ნიშნავს, რომ პრობლემური მონაკვეთების მოგვარებით შესაძლებელია ავტოსატრანსპორტო შემთხვევებით გამოწვეული ფატალური შემთხვევების მნიშვნელოვნად შემცირება.

აუდიტის შედეგად, გამოვლინდა, რომ „შავი წერტილების“ იდენტიფიცირების თვალსაზრისით, პრობლემა იკვეთება საგზაო-სატრანსპორტო შემთხვევის ადგილმდებარეობის დადგენის სიზუსტეში.

4. დღეს მართვის მოწმობის აღება შეუძლია ყველას და ამისთვის ავტომობილის მართვის ცოდნა სულაც არ არის საჭირო. გავრცელებულია ე.წ. "ავტოსკოლები", რომლებიც კოდირების და ხრიკების გზით ამზადებენ მოსწავლეს. რაც იმას ნიშნავს, რომ თუ ტესტი შედგენილია თუნდაც თქვენთვის უცხო ენაზე, თქვენ მაინც ახერხებთ თეორიული გამოცდის ჩაბარებას. დღემდე ვერ მოხერხდა პრაქტიკული გამოცდის ქალაქის რეალურ სივრცეში გატანა და ის კვლავ დახურულ მოედანზე წარმოებს.

5. ცნობილია, რომ "მკვლელ დარღვევებს" განეკუთვნება, თრობის ქვეშ საჭის მართვა და სიჩქარის გადაჭარბება. ზედმეტად ლოიალურია კანონმდებლობა მთვრალი პირის მიმართ, რომელსაც საერთაშორისო პრაქტიკაში "პოტენციურ მკვლელს" უწოდებენ. მართვის უფლების შეჩერება 6 თვის ვადით, მითუმეტეს 3 თვის შემდეგ თანხის სანაცვლოდ შესაძლებელია მართვის მოწმობის კვლავ აღდგენა.

6. მოსახლეობის ცნობიერების ამაღლების მიზნით, საგზაო უსაფრთხოების საკითხებში, საერთოდ არ მიმდინარეობს სოციალური კამპანია, რომელსაც აქტიურად მიმართავს ყველა წარმატებული ქვეყანა

და ბოლოს, უნდა დაინერგოს უსაფრთხო სისტემის მიდგომა („Safe System“ Approach) - ეფუძნება ვარაუდს, რომ ადამიანი ყოველთვის დაუშვებს შეცდომებს, რის გამოც, საგზაო უსაფრთხოება მხოლოდ ადამიანის გამოსწორებაზე მუშაობით ვერ მიიღწევა. მნიშვნელოვანია, ადამიანის გარე ძალების
მიმართ ამტანობის გათვალისწინება და სატრანსპორტო სისტემის ისე მოწყობა, რომ ადამიანი, შეცდომის დაშვების შემთხვევაშიც კი, არ დაექვემდებაროს ძალას, რომლის მიმართაც შეუძლებელია მისი სიცოცხლის შენარჩუნება. უსაფრთხო სისტემის მიდგომის მნიშვნელოვანი ელემენტია სიჩქარის მართვა, ვინაიდან კინეტიკური ძალის შემცირება პირდაპირ ზემოქმედებს სიცოცხლის შენარჩუნებაზე. აღნიშნული პრინციპი გაეროს საგზაო უსაფრთხოების სამოქმედო გეგმის და სხვადასხვა ქვეყნის ეროვნული სტრატეგიის ქვაკუთხედია. აღნიშნული პრინციპის საგზაო უსაფრთხოების ეროვნულ სტრატეგიაში გათვალისწინება და იმპლემენტაცია წარმატებულია რიგ ქვეყნებში: ირლანდია, პოლონეთი, კატარი, ავსტრალია და სხვა",- წერია გავრცელებულ განცხადებაში.