სოფიო კილაძე ტატუნაშვილი-ოთხოზორიას სიასთან დაკავშირებით ოპოზიციის ბრალდებას პასუხობს

ადამიანის უფლებათა დაცვის კომიტეტის თავჯდომარე ოპოზიციის ნაწილს ცრუ ინფორმაციის გავრცელებაში ადანაშაულებს.

სოფო კილაძის განმარტებით, სანამ არ იქნება დადასტურებული ინფორმაცია, რომ ე.წ. ტატუნაშვილი-ოთხოზორიას სიაში კონკრეტული პირები არიან გარდაცვლილები, სიიდან მათი ამოღება ვერ მოხდება.

კილაძე ამბობს, რომ ოკუპირებულ ტერიტორიებზე ადამიანის უფლებების მხრივ მდგომარეობა უმძიმესია და ხელისუფლებამ ყველა მექანიზმი უნდა გამოიყენოს, რომ ადამიანები დაიცვას. დეპუტატის განცხადებით, დე-ფაქტო რეჟიმის არც ერთ წარმომადგენელს არ უნდა ჰქონდეს განცდა, რომ ის დაუსჯელი დარჩება.

„გავაგრძელებთ მუშაობას ამ სიის დახვეწაზე. რაც შეეხება ამ სიაში გარდაცვლილ პირთა ჩასმას, მინდა გითხრათ, რომ სანამ არ გვექნება დადასტურებული ინფორმაცია, რომ კონკრეტული პირები არიან გარდაცვლილები, ამ ადამიანებს ვერ ამოვიღებთ სიიდან. ამას სჭირდება მუშაობა და სამწუხაროდ, ოპოზიციის ნაწილი ძალიან ხშირად არის შემჩნეული იმაში, რომ ავრცელებენ ცრუ ინფორმაციას საზოგადოებაში. ჩვენ ვიმუშავებთ და საბოლოოდ მივიღებთ სრულყოფილ, დახვეწილ სიას, ისეთს, სადაც თითოეული ადამიანი, ვინც დანაშაული ჩაიდინა, იქნება დასჯილი და მათ შორის არ იქნება არც ერთი ქვეყნის მოქალაქეები გამონაკლისი, მათ შორის არც რუსეთის, მაგრამ ამას აქვს თავისი პროცედურები“,- განაცხადა სოფო კილაძემ.

ოპოზიციური პარტიის წარმომადგენლების მტკიცებით, ოთხოზორია-ტატუნაშვილის სიაში რამდენიმე წლის წინ გარდაცვლილი ადამიანები მოხვდნენ, რომელთა წინააღმდეგაც სანქციების დაწესება ფიზიკურად შეუძლებელია. ეს ადამიანები არიან: სლავიკი ბადია, ეკა ახალაია, როზა მირცხულავა, ალიკ წარბია და ოთარ ტურნანბა. ამის შესახებ დღევანდელ პრესკონფერენციაზე ევროპული საქართველოს წევრმა, ვიცესპიკერმა სერგი კაპანაძემ განაცხადა და დასძინა, რომ ხელისუფლება სიის შედგენას უპასუხისმგებლოდ მოეკიდა.

26 ივნისს პრემიერმინისტრმა მამუკა ბახტაძემ „ოთხოზორია-ტატუნაშვილის შავ სიაში“ 33 ადამიანის შეყვანის შესახებ განაცხადა. „ოთხოზორია-ტატუნაშვილის შავ სიას“ აფხაზეთის საოკუპაციო რეჟიმმა საქართველოს მთავრობის დესტრუქციული ქმედება უწოდა. 

2017 წლის 5 მარტს პარტია „ევროპულმა საქართველომ“ საპარლამენტო უმრავლესობას არჩილ ტატუნაშვილთან დაკავშირებით რეზოლუციის საერთო დოკუმენტის შექმნა შესთავაზა. 21 მარტს, საქართველოს პარლამენტმა რეზოლუციის პროექტი 106 ხმით დაამტკიცა.