ლეღვის ფოთლის ნახარშით დამწვარი ბიჭი რეანიმაციულ განყოფილებაშია

თბილისში, ლეღვის ფოთლის ნახარშით მიღებული დამწვრობის გამო 23 წლის ბიჭი დამწვრობის ცენტრის რეანიმაციულ განყოფილებაშია, 26 წლის გოგომ კი დამწვრობის ცენტრში მკურნალობაზე უარი თქვა და დაწესებულება ხელწერილის საფუძველზე დატოვა. ინფორმაციას სააგენტო "ინტერპრესნიუსი" ავრცელებს.

„26 წლის ქალბატონსაც აუცილებლად სჭირდებოდა სტაციონარული მკურნალობა, თუმცა მან უარი განაცხადა და თავად მიიღო ეს გადაწყვეტილება. მათ მე–2 და მე–3 ხარისხის ქიმიური დამწვრობები აღენიშნებათ, რომელიც რუჯის მისაღებად ლეღვის ნახარშის გამოყენებით მიიღეს. წელს სულ ლეღვის ნახარშის გამოყენების სამი შემთხვევა გამოვლინდა, მათგან ორი შემთხვევა რუჯის მიღების მიზნით, ხოლო „სამკურნალო თვალსაზრისით“ – ერთი. ერთ–ერთ ქალბატონს მოატყუეს, სახსრები აწუხებდა და ლეღვის ნახარშის საფენების გაკეთება ურჩიეს“, - განაცხადა დამწვრობის ცენტრის ხელმძღვანელმა გუგა ქაშიბაძემ

საქართველოში ამ ზაფხულს ლეღვის ფოთლის ნახარშით მიღებული დამწვრობის პირველი შემთხვევა თბილისში დაფიქსირდა. დამწვრობის ცენტრს ლეღვის ფოთლის ნახარშით დამწვარმა ორმა პაციენტმა, 23 წლის ბიჭმა და 26 წლის გოგომ მიმართეს.