გერმანული ტელეკომპანია: საქართველო თავშესაფრის საკითხში კომპრომისის მაგალითია

გერმანულმა ტელეკომპანიამ „მითელდოიჩერ რუნდფუნკი“ საქართველოს შესახებ სიუჟეტი მოამზადა, რომელიც საქართველოსა და გერმანიას შორის რეადმისიის საკითხში თანამშრომლობას ეხებოდა. ინფორმაციას საქართველოს შინაგან საქმეთა სამინისტრო ავრცელებს.

უწყების ცნობით, სიუჟეტში აღნიშნულია, რომ ევროპაში მიგრაციის კრიზისის ფონზე, საქართველო იმის თვალსაჩინო მაგალითია, თუ როგორ შეიძლება მოქმედებდეს ლტოლვილთა წარმოშობის ქვეყანასთან გაფორმებული რეადმისიის ხელშეკრულება.

ტელეკომპანია აღნიშნავს, რომ გერმანიის უწყებები სწრაფად იღებენ ამა თუ იმ პირის საიდენტიფიკაციო მონაცემებს, ხოლო ქართველ თავშესაფრის მაძიებელთა რეადმისია, რომელთაც უარი ეთქვათ თავშესაფარზე, ქართველი პოლიციელების მიერ სულ რამდენიმე დღეში ხორციელდება.

„გერმანიის ბუნდესტაგის დეპუტატი მარიან ვენდტი, გერმანულ ტელეკომპანიასთან ინტერვიუში აცხადებს, რომ საქართველოს შემთხვევა ავსტრიასთან, იტალიასთან, ბულგარეთთან, საბერძნეთთან თანამშრომლობის ნიმუშად შეიძლება გამოდგეს, რათა ამ ქვეყნებმაც მიიღონ შესაბამისი ზომები.

თუმცა, სიუჟეტის ავტორები აცხადებენ, რომ ეს ადვილი არ იქნება და დასტურად უნგრეთის პრემიერმინისტრის ვიქტორ ურბანის ბერლინში ვიზიტისას გაკეთებული განცხადება მოჰყავთ, რომლის მიხედვითაც უნგრეთი გერმანიიდან იმ ლტოლვილებსაც კი არ დაიბრუნებდა, რომლებიც თავდაპირველად უნგრეთში იქნებოდნენ რეგისტრირებულები.

ჟურნალისტმა აღნიშნა, რომ ერთობლივ კონფერენციაზე გერმანიის კანცლერი ანგელა მერკელი ამ საკითხთან დაკავშირებით გაღიზიანებული ჩანდა და ძირითად ევროპულ ღირებულებებზე, მათ შორის - ჰუმანურობაზე, მიუთითებდა,” - ნათქვამია ინფორმაციაში.

შსს-ს ცნობით, სიუჟეტი გერმანული ტელეკომპანიის ეთერში 5 ივლისს გავიდა და ის კიდევ ერთხელ უსვამს ხაზს საქართველოს მთავრობის, კერძოდ შინაგან საქმეთა სამინისტროს მიერ უვიზო რეჟიმის პირობებში გატარებულ წარმატებულ ღონისძიებებს.

6 ივლისს, გერმანიის შინაგან საქმეთა მინისტრის მოადგილემ, შტეფან მაიერმა თქვა, რომ გერმანიის მხრიდან საქართველოსთან უვიზო რეჟიმის შეჩერების რისკი დღის წესრიგში არ დგას. 

ცნობისთვის, მიმდინარე წლის 9 მაისს, საქართველოს მიერ „უნებართვოდ მცხოვრებ პირთა რეადმისიის შესახებ“ გაფორმებული შეთანხმებების ფარგლებში, გერმანიიდან ჩარტერული რეისით საქართველოს 68 მოქალაქის რეადმისია განხორციელდა.