თამბაქოს კონტროლის ალიანსი „თამბაქოს შესახებ“ კანონში ცვლილების განხილვას ეწინააღმდეგება

თამბაქოს კონტროლის ალიანსი 16 ივლისს, პარლამენტში, ჯანდაცვის კომიტეტში საკანონმდებლო ცვლილების წინადადებათა განხილვას ეხმიანება და აცხადებს, რომ საქართველოს საკანონმდებლო და აღმასრულებელი ხელისუფლება საზოგადოებას „აბოლებს“.

ალიანსი დაუშვებლად მიიჩნევს კანონში შესაძლო ცვლილებებს, რომელთა მიხედვითაც, მოწევა შეიძლება დაიშვას სლოტ-კლუბებში და ნებისმიერ შენობაში, სადაც სათამაშო ბიზნესის სახეობები იმართება, ასევე, თეატრებში, სცენაზე, სპექტაკლის მიმდინარეობის დროს, როგორც შემოქმედებითი ნაწილი. 

16 ივლისს პარლამენტმა განიხილა წინადადებები, რომელთა მიხედვით, შესაძლოა, თამბაქოს კონტროლის კანონში ცვლილებები შევიდეს. კერძოდ, სლოტ-კლუბებში და ნებისმიერ შენობაში, სადაც სათამაშო ბიზნესის სახეობები იმართება, თამბაქოს მოხმარება დაიშვას. ასევე, მოითხოვენ მოწევა დაიშვას თეატრებში, სცენაზე, სპექტაკლის მიმდინარეობის დროს, როგორც შემოქმედებითი ნაწილი. ცვლილებათა ავტორები ასევე მოითხოვენ, რომ თამბაქოს კონტროლის კანონით შეზღუდვები მოიხსნას სახმელეთო სასაზღვრო პუნქტების თავისუფალ ზონებში, ე.წ. „დუტი ფრიში“ და ისეთივე თავისუფლება მიეცეთ, როგორ აროპორტის საბაჟო ტერიტორიაზე არსებულ თავისუფალ ზონებს, სადაც სავალდებულო არ არის თამბაქოს ნაწარმის პიქტოგრამებიანი შეფუთვით რეალიზაცია. 

ალიანსში აცხადებენ, რომ ამ ტიპის საკანონმდებლო წინადადებების განხილვა მიუღებელია.

"კანონი, ფაქტობრივად, 100%-ით სრულდება, ანუ ე.წ. სამასპინძლო ბიზნესში, კაფე-ბარებსა და რესტორნებში, ღამის კლუბებში და პაბებში ხალხი უპრობლემოდ იცავს კანონს. თამბაქოს კონტროლის შესახებ კანონპროექტზე იმდენ ხანს ვმსჯელობდით და ისეთი მასშტაბით განვიხილავდით, ფაქტობრივად, არ უნდა დარჩენილიყო შენიშვნების და შესწორებების საჭიროება და ის, რაც 16 ივლისს პარლამენტმა საკანონმდებლო წინადადებების სახით განიხილა, არის თამბაქოს ინდუსტრიის მცდელობა მათი ინტერესების დამცველების, ლობების სახით, აღმასრულებელი და საკანონმდებლო ხელისუფლებიდან მოახდინოს კანონის დისკრედიტაცია და დაშალოს იგი ნაწილებად", - წერია განცხადებაში.

როგორც თამბაქოს კონტროლის ალიანსის მიერ გავრცელებულ განცხადებაშია ნათქვამი, ალიანსი არ აპირებს მხარი დაუჭიროს კანონის დაშლის მცდელობას და მოუწოდებს ხელისუფლებას, შეასრულოს კონსტიტუციით დაკისრებული ვალდებულებები.