არასამთავრობოებმა ღამის კლუბებში ჩატარებული სპეცოპერაციის ხარვეზები დაადგინეს

„ადამიანის უფლებების სწავლებისა და მონიტორინგის ცენტრის“ (EMC) და საქართველოს ახალგაზრდა იურისტთა ასოციაციის (საია) მომზადებული ერთობლივი ანგარიშის თანახმად, თბილისის ღამის კლუბებში ჩატარებული საპოლიციო ღონისძიებები სახელმწიფოს რეპრესიული აპარატის და ძალის დემონსტრირებაზე იყო გათვლილი. ანგარიში საიას ოფიციალურ ვებგვერდზე ქვეყნდება.

ანგარიში 2018 წლის 12 მაისს, თბილისის ღამის კლუბებში ჩატარებულ მასშტაბურ საპოლიციო ოპერაციას და მასთან დაკავშირებულ მოვლენებს ეხება.

კვლევის ავტორების განცხადებით, გამოიკვეთა, რომ შსს-ს არცერთი არგუმენტი, ჩხრეკის ჩატარების აუცილებლობასთან დაკავშირებით, მყარი არ არის.

„თუკი პოლიციას კლუბების ტერიტორიაზე ნარკოტიკული საშუალებების აღმოჩენის მიზანი ამოძრავებდა, მაშინ გაუგებარი რჩება, რატომ არ ჩაატარა პოლიციამ ჩხრეკა ისეთ დროს, როცა კლუბებში კონკრეტული ღონისძიებები არ იქნებოდა, მითუმეტეს რომ პოლიციამ ჩხრეკის ჩატარების ნებართვა სასამართლოსგან 10 მაისს მიიღო;

12 მაისს, ორივე კლუბში ჩხრეკა ჩატარდა ღამის საათებში. კანონმდებლობა ღამის საათებში ჩხრეკის ჩატარებას მხოლოდ გადაუდებელი აუცილებლობის შემთხვევაში ითვალისწინებს. მიუხედავად ამისა, ჩხრეკის ოქმში გადაუდებელი აუცილებლობის შესახებ აღნიშნული არ არის;

პრობლემურია ჩხრეკის პროცესში სპეცრაზმის გამოყენების საკითხი. 12 მაისის საპოლიციო ღონისძიებაში სპეცრაზმის ჩართვა ძალის დემონსტრირებად და არაპროპორციულ ღონისძიებად შეიძლება შეფასდეს იმ პირობებში, როცა კლუბის შიგნით შეიარაღებული პირის, ან პოტენციური წინააღმდეგობის შესახებ ინფორმაცია არ არსებობდა“, - ნათქვამია ანგარიშში.

12 მაისის ღამეს შსს-მ თბილისის ღამის კლუბებში სპეცოპერაცია ჩაატარა. მანამდე კი 8 ნარკორეალიზატორი დააკავა. 

თეთრი ხმაურის მოძრაობამ და ახალგაზრდებმა მიიჩნიეს, რომ სამართალდამცველებმა სპეცოპერაციისას ძალას გადაამეტეს და ამიტომ აქციები იმ ღამესვე გამართეს. პროტესტი 12-13 მაისსაც გაგრძელდა. აქციის მონაწილეებმა დაშლის გადაწყვეტილება მას შემდეგ მიიღეს, როცა პარლამენტის წინ თავად შინაგან საქმეთა მინისტრი მივიდა, რომელმაც მათ ბოდიში მოუხადა და პრობლემების მოგვარებას დაჰპირდა.

23 მაისს კლუბ BASSIANI-ს ტერიტორიაზე სამართალდამცველები და კლუბის ხელმძღვანელები მივიდნენ. კრიმინალური პოლიციის წარმომადგენლებმა კლუბს სპეციალური ლუქი მოხსნეს.