ადიგენის მერი უარყოფს ცნობას, რომ ოპოზიციონერ დეპუტატს ქართული ოცნების წევრებმა სცემეს

მომხდარ ჩხუბთან „ქართულ ოცნებას“ არანაირი კავშირი აქვს, - ამის შესახებ ადიგენის მუნიციპალიტეტის მერმა, ზაქარია ენდელაძემ განაცხადა. ინფორმაციას 1tv ავრცელებს.

მისი თქმით, ადიგენის მუნიციპალიტეტის მაჟორიტარი დეპუტატის და „ევროპული საქართველოს“ წევრის, ზურაბ შაინიძის ბრალდებები სიმართლეს არ შეესაბამება.

„ჩემთვის მნიშვნელობა არ აქვს, რას ამბობს ზურა შაინიძე. ეს იყო სახალხო დღესასწაული და ჩხუბთან „ქართულ ოცნებას“ კავშირი არ აქვს. გუშინ დავესწარით დღესასწაულს, სტუმრებიც გვყავდა, გავისტუმრეთ და მშვიდობიანად დავიშალეთ. ამ ხალხის მიმართ მუქარა არც არასოდეს ყოფილა, მათი მხრიდან ეს განცხადება პროვოკაციაა“, – აცხადებს ადიგენის მუნიციპალიტეტის მერი ზაქარია ენდელაძე.

ადიგენის მუნიციპალიტეტის მაჟორიტარი დეპუტატი, „ევროპული საქართველოს“ წევრი ზურაბ შაინიძე „ქართული ოცნების“ წევრებს ცემაში ადანაშაულებს.

ზურაბ შაინიძე ჰყვება, რომ გუშინ სოფელ ზანავისა და გომაროს მიმდებარე ტერიტორიაზე, ფერსის მთაზე შუამთობის დღესასწაული აღინიშნებოდა. ღონისძიების დასრულების შემდეგ კი სტადიონზე ახალგაზრდებს შორის დაწყებული კამათი დაპირისპირებაში გადაიზარდა.

შაინიძე ამბობს, რომ კონფლიქტის დაწყების შემდეგ, სტადიონზე მმართველი პარტიის რამდენიმე ათეული წევრი ​ხელკეტებითა და ჯოხებით მივიდნენ, შემდეგ კი მასსა და მისი შვილის მეგობრებს ფიზიკურად გაუსწორდნენ. მისივე თქმით, დაშავებულებს პირველადი დახმარების აღმოსაჩენად საავადმყოფოში გადაყვანა დასჭირდათ. თავად დეპუტატს, მისი თქმით, თავის არეში აქვს დაზიანებები მიღებული.

„ევროპული საქართველოს“ მაჟორიტარი დეპუტატი მომხდარს პოლიტიკურ ანგარიშსწორებას უკავშირებს და ამბობს, რომ „ქართული ოცნების“ მხრიდან ზეწოლა მასზე და მის ოჯახზე მუდმივად მიმდინარეობს.