პარლამენტის ქუთაისიდან თბილისში გადმოტანა. შეფასებები

საგაზაფხულო სესია, სავარაუდოდ, უკვე თბილისში გაიხსნება. მმართველი გუნდის გადაწყვეტილებით, საკანონმდებლო საქმიანობა ქუთაისიდან თბილისში სრულად გადმოვა. თუმცა ეს მას შემდეგ მოხდება, რაც პარლამენტი რეგლამენტში ცვლილებებს დაამტკიცებს და ახალი კონსტიტუცია ამოქმედდება. საკითხი საკანონმდებლო ორგანოში ისევ აზრთა სხვადასხვაობის მიზეზი გახდა. 

ქუთაისის მაჟორიტარი დეპუტატი გენადი მარგველაშვილი საკანონმდებლო ორგანოს დედაქალაქში გადატანას არ ეთანხმება. მარგველაშვილმა განუცხადა, ქუთაისი მეტ ყურადღებას იმსახურებს.

„პარლამენტის გადატანას პრინციპულად არ ვეთანხმები, მაგრამ გუნდის წევრად ვრჩები. ქუთაისი მეტ ყურადღებას იმსახურებს და იმედია, ქალაქი რაიმე ალტერნატიულ პროექტს მიიღებს. თუ პარლამენტი გადავა, მოსახლეობას ალერნატიული პროექტები სჭირდება“, – განაცხადა მარგველაშვილმა.

ფრაქცია „ქართული ოცნების“ თავმჯდომარე მამუკა მდინარაძე ამბობს, რომ ქუთაისში პარლამენტის არსებობას განსაკუთრებული ეკონომიკური სარგებელი არ მოაქვს.

„თავის დროზე, მიხეილ სააკაშვილმა გადაწყვეტილება პარლამენტის დასასუსტებლად მიიღო. მაშინ, როცა კონსტიტუციიდან დაწყებული რეგლამენტით დასრულებული, პარლამენტის გაძლიერებას ვფიქრობთ, ლოგიკური გადაწყვეტილებაა, რომ მთავრობა და პარლამენტი ერთ ქალაქში იყოს. პრეცედენტს ვერ ნახავთ, როცა ხელისუფლების ეს ორი შტო სხვადასხვა ქალაქშია გაბნეული, რაც პრაქტიკაში ბევრ ნიუანსში ქმნის პრობლემებს“, – განაცხადა მდინარაძემ.

„ნაციონალური მოძრაობის“ წევრის, სალომე სამადაშვილის განცხადებით, თუ საკანონმდებლო ორგანო თბილისში დაბრუნდება, ეს ზეგავლენას იმ ხალხზე მოახდენს, ვინც ქუთაისში პარლამენტის არსებობაზეა დამოკიდებული.

„რეალურად, ქუთაისში პარლამენტიც არ არის ბოლომდე გადმოსული, ეს პროცესი “ქართულმა ოცნებამ” ჯერ კიდევ 2012 წელს შეაჩერა. ვხედავთ, რომ დეცენტრალიზაცია ვერ ხდება, ახალი სამუშაო ადგილები არ იქნება და ქუთაისში ხალხი როგორ ცხოვრობს, ესეც ნათელია”, – დასძინა სამადაშვილმა.

დღეს გავრცელდა ინფორმაცია, რომ პარლამენტი თბილისში სრულად დაბრუნდება.