როგორ მკურნალობენ და რა სიმპტომები ახასიათებს სეზონურ გრიპს

დაავადებათა კონტროლის ეროვნული ცენტრის ინფორმაციით, სეზონური გრიპი, გრიპის A და B ვირუსით გამოწვეული მწვავე ინფექციური დაავადებაა, რომელიც სასუნთქ სისტემას (ცხვირი, ყელი, ფილტვები) აინფიცირებს.

სპეციალისტების განმარტებით, გრიპი ხასიათდება როგორც მსუბუქი, ისე მძიმე მიმდინარეობით და შესაძლოა დასრულდეს ლეტალური გამოსავლითაც. უბრალო გაციებისგან განსხვავებით გრიპი მწვავედ იწება. მისთვის დამახასიათებელი სიმპტომებია: საერთო სისუსტე, ცხელება >38 0C , ხველა, ფარინგიტი (ყელის ტკივილი), ცხვირიდან გამონადენი, თავის ტკივილი, ტკივილი კუნთებში; იშვიათად დიარეა და/ან ღებინება.

მათივე შეფასებით, გრიპი ადამიანიდან ადამიანზე გადაეცემა ხველით, ცემინებით, ვირუსით დაბინძურებულ საგნებთან ან ზედაპირებთან შეხებით. გრიპმა შესაძლებელია გამოიწვიოს სიცოცხლისათვის საშიში გართულებები,
განსაკუთრებით მაღალი რისკის ჯგუფებში.

გრიპის გართულებებია:
• პნევმონია (ფილტვების ანთება) ‐ ქოშინი, სუნთქვის გაძნელება, ჰიპოქსია,
ციანოზი;
• დარღვევები ცენტრალური ნერვული სისტემის მხრივ (გონების დაკარგვა ან დაბინდვა, ძილიანობა, კრუნჩხვები, კუნთების მკვეთრი სისუსტე ან დამბლა).
• ორგანიზმის მკვეთრი გაუწყლოება (დეჰიდრატაცია);
• თანმხლები დაავადებების გართულება (მაგ:გულის შეგუბებითი უკმარისობა, ასთმა და დიაბეტი);
• ბავშვებში ყურის ინფექციები, სინუსიტები. ჩვილ ბავშვებს გრიპის დროს შესაძლოა განუვითარდეთ ფებრილური კრუნჩხვები, ცრუ კრუპის სინდრომი.

ამასთან სპეციალიტები განმარტავენ, რომ სეზონური გრიპის დროს დიაგნოზი დგინდება მხოლოდ კლინიკური სიმპტომების საფუძველზე. მკურნალობის დანიშვნისას არ არის საჭირო ვირუსის ლაბორატორიულად დადასტურება, ვინაიდან ტესტის პასუხი ჩვეულებრივ არ ცვლის მკურნალობის ტაქტიკას.

სპეციალისტები პაციენტებს აფრთხილებენ, რომ არსებობს ანტივირუსული პრეპარატები, რომელიც შეიძლება პაციენტმა გამოიყენოს გრიპის სამკურნალოდ. თუმცა, აუცილებელია გაითვალისწინონ, რომ ანტივირუსული პრეპარატები მიიღონ მხოლოდ ექიმის დანიშნულებით. ვინაიდან, თვითმკურნალობა ანტიბიოტიკებით თუ სხვა პრეპარატებით კატეგორიულად მიუღებელია.