კობახიძე „პალიტრამედიის“ სტამბაში საგამოძიებო პროცესების დაწყებას ეხმიანება

ტელეკომპანია პირველის ეთერში, საქართველოს პარლამენტის თავმჯდომარემ, ირაკლი კობახიძემ საქართველოში მედიაგარემოს შესახებ და ტელეკომპანია „იბერიისა“ და „პალიტრამედიის“ ირგვლივ განვითარებულ მოვლენებზე ილაპარაკა.

კობახიძის თქმით, გარკვეული ტელეკომპანიები ხელოვნურად ქმნიან აჟიოტაჟს ქვეყანაში.

პალიტრამედიის სტამბაში პროკურატურის შესვლას, პარლამენტის თავმჯდომარე ჩვეულებრივ სამართლებრივ პროცესს უწოდებს და ამბობს, რომ ეს არის აბსოლიტურად გამჭირვალე პროცესი.

კითხვაზე, ხომ არ უკავშირდება ეს პროცესები ეკონომიკის ყოფილ მინისტრს, დიმიტრი ქუმსიშვილის საქმეს, კობახიძე ამბობს, რომ მას ამის შესახებ ინფორმაცია არ აქვს.

„საერთოდ არ ვიცი, რა კავშირი აქვს. ერთადერთი მოვისმინე, რომ ნათესაური კავშირი ჰქონია დიმა ქუმსიშვილს კონკრეტულ ხელმძღვანელ პირებთან პალიტრაში. მეტი მე არანაირი ინფორმაცია არ მაქვს. აქაც იგივეა, ატყდება რაღაც აჟიოტაჟი, სინამდვილეში შევლენ სამართალდამცავი ორგანოები, ყველაფერი არის აბსოლუტურად ღია და გამჭვირვალე, შევლენ, დასვამენ კითხვებს. კითხვებს თუ გაეცემა პასუხები, როგორც ეს ხდება ხოლმე, ამ შემთხვევაში იქნება ერთი განვითარება. თუ დადგინდება, დანაშაული, ბუნებრივია, გამოვლინდებიან დამნაშავეები“, - განაცხადა ირაკლი კობახიძემ.

პალიტრამედიის სტამბაში მთავარი პროკურატურის გამომძიებლების შესვლაზე ინფორმაცია ჰოლდინგმა გაავრცელა.

ჰოლდინგი აცხადებს, რომ 01.01.14-დან 11.09.18-ის ჩათვლით “სრული სამართლებრივი, საბუღალტრო, ფინანსური და ეკონომიკური დოკუმენტაცია (დედანი) და საწარმოს ამავე პერიოდის კორესპონდენცია (დედანი)” მოითხოვეს.

დღესვე, ოფიციალური განცხადება გაავრცელა პროკურატურამ, უწყების ინფორმაციით, გამოძიება დაიწყო საქმეზე, რომელიც სახელმწიფო პროგრამა ,,აწარმოე საქართველოს“ ფარგლებში, ცალკეულ საჯარო მოხელეთა მიერ სამსახურებრივი მდგომარეობის გამოყენებით, სახელმწიფოს კუთვნილი დიდი ოდენობით თანხების შესაძლო გაფლანგვის ფაქტებს ეხება.

საქართველოს პროკურატურაში ყოფილი მაღალჩინოსნების, დიმიტრი ქუმსიშვილის საქმიანობაზე გამოძიება ივლისში დაიწყო.

დიმიტრი ქუმსიშვილი საქართველოს მთავრობაში 2012 წლის ბოლოს, საპარლამენტო არჩევნებში საარჩევნო ბლოკის „ქართული ოცნება“ გამარჯვების შემდეგ მივიდა და ეკონომიკის მინისტრად დაინიშნა. მანამდე ის ძირითადად საბანკო სექტორში მუშაობდა, მათ შორის 1997-2011 წლებში „ბანკი ქართუს“ ჯერ ხაზინის უფროსად, შემდეგ კი გენერალური დირექტორის პირველ მოადგილედ. ეკონომიკის მინისტრი ქუმსიშვილი 2015 წელს ვიცეპრემიერიც გახდა. 2016 წელს ის ფინანსთა მინისტრად დაინიშნა და პირველი ვიცეპრემიერის თანამდებობაც შეინარჩუნა, ხოლო 2017 წელს კვლავ ეკონომიკის და მდგრადი განვითარების მინისტრის პოზიციაზე დაბრუნდა და ეს თანამდებობა პრემიერმინისტრ გიორგი კვირიკაშვილის გადადგომის შემდეგ დატოვა. მალევე ცნობილი გახდა, რომ ახალი პრემიერის მამუკა ბახტაძის დროებით სამთავრობო გუნდში მისი კანდიდატურა აღარ მოიაზრებოდა.