ელჩი ირანის მოქალაქეების საქართველოში არშემოშვებაზე: მაჩვენებელი ძალიან მომატებული არაა

ირანულ მხარეს მიაჩნდა, რომ ბოლო პერიოდში დიდი რაოდენობით ირანის მოქალაქეები არ შემოუშვეს საქართველოში, თუმცა სტატისტიკა სხვა რამეზე მეტყველებს, - ამის შესახებ ჟურნალისტებს ირანში საქართველოს ელჩმა იოსებ ჩახვაშვილმა განუცხადა. ინფორმაციას სააგენტო "ინტერპრესნიუსი" ავრცელებს.

"განმარტება მიეცა ირანულ მხარეს. არის პრობლემები, მათ შორის ირანული მხრიდანაც. ძალიან დიდი რაოდენობით იყო შემოსული ნარკოტიკები საქართველოში, რასაც ირანულმა მხარემ ხაზი გაუსვა და დადებითად წაადგება ამ პრობლემის გადაჭრას. ირანის მხარე ყოველთვის ხაზს უსვამს შემდეგ გარემოებას: საქართველოს და მის მესაზღვრეებს აქვთ სრული სუვერენული უფლება, რომ მოიქცნენ კანონის სრული დაცვით. საქართველოს სუვერენული უფლებაა მიიღოს გადაწყვეტილება შემოშვება-არშემოშვებასთან დაკავშირებით. მათი თხოვნაა უფრო მეტი ლმობიერება გამოვიჩინოთ ირანელი ტურისტების და კონკრეტულად ირანელი ქალების მიმართ. სხვა მიზეზები არ ყოფილა. ორ ქვეყანას შორის ხელშეკრულება არის გაფორმებული ვიზების გაუქმებასთან დაკავშირებით, ამიტომაც სრულიად თავისუფლად შეუძლიათ საქართველოში შემოსვლა და სტატისტიკაც ამას მეტყველებს. დაახლოებით 350 000 ადამიანი შემოდის საქართველოში ირანიდან", - განაცხადა ჩახვაშვილმა.

მისი თქმით, ბოლო დროს განვითარებულ მოვლენებთან დაკავშირებით ორჯერ იყო თეირანში, საგარეო საქმეთა სამინისტროში, სადაც ჰქონდა მნიშვნელოვანი შეხვედრები, რომელიც დაკავშირებულია ორმხრივ ურთიერთობებთან და ასევე იმ მცირე გაუგებრობებთან დაკავშირებით, რომელიც იყო ჩვენს საზღვარზე.

"ირანის ელჩმა გამოთქვა სრული მზადყოფნა თანამშრომლობისთვის. უახლოეს მომავალში შედგება შეხვედრები ორმხრივ ფორმატში, მათ შორის ირანის სასაზღვრო დეპარტამენტის ხელმძღვანელობასთან. ვადები და შეხვედრის ადგილი დადგინდება და ყველა საკითხი, რომელიც წარმოიქმნება მხარეთა შორის, გადაიჭრება ყოველგვარი გაუგებრობის გარეშე", - განაცხადა ელჩმა.

მანამდე ირანის საგარეო საქმეთა სამინისტრომ თავისი ქვეყნის მოქალაქეებს საქართველოში მოგზაურობისგან თავის შეკავებისკენ მოუწოდა. პრესსპიკერის განცხადებით, ირანის მთავრობამ ეს გადაწყვეტილება საქართველოში ზოგიერთი ირანელის მიმართ გამოხატული უპატივცემულო დამოკიდებულების გამო მიიღო. 

დეკემბრის დასაწყისში ირანულმა მედიამ დაწერა, რომ ბოლო ერთი თვის განმავლობაში საქართველოს სახმელეთო და საჰაერო საზღვრიდან ირანის 200-მდე მოქალაქეა დეპორტირებული. მათ შორის ისეთი პირებიც, რომლებსაც საბუთები წესრიგში ჰქონდათ.

ამ საკითხზე მალევე კომენტარი საქართველოს საგარეო საქმეთა მინისტრმა დავით ზალკალიანმა გააკეთა. მინისტრის განცხადებით, მცდარია ინფორმაცია იმის შესახებ, თითქოს ირანის 200 მოქალაქე საზღვარზე არ შემოუშვეს.