მოხსენების შემდეგ სალომე ზურაბიშვილი დეპუტატების შეკითხვებს არ უპასუხებს

პარლამენტში მოხსენებით გამოსვლის შემდეგ სალომე ზურაბიშვილი შეკითხვებს არ უპასუხებს. როგორც პრეზიდენტის პრესსპიკერმა განაცხადა, სალომე ზურაბიშვილი, ქვეყნის განვითარების უმნიშვნელოვანეს საკითხებზე საქართველოს პარლამენტის წინაშე მოხსენებით 6 მარტს წარდგება:

"პარლამენტის რეგლამენტის თანახმად, პრეზიდენტის გამოსვლის დასრულების შემდეგ სიტყვით გამოვლენ იმ ფრაქციების თავმჯდომარეები, რომლებიც არ არიან არც უმრავლესობაში და არც უმცირესობაში, შემდეგ უკვე უმცირესობის და უმრავლესობის ლიდერთა გამოსვლაა რეგლამენტით გათვალისწინებული. შეკითხვების ფორმატი, პარლამენტის ახალი რეგლამენტის თანახმად, არ არის გათვალისწინებული",- განაცხადა ხატია მოისწრაფიშვილმა.

ერთ-ერთი საკითხი, რომელზეც პრეზიდენტი მოხსენებისას ისაუბრებს, შეწყალებაა:

„ამ თემაზე საქართველოს პრეზიდენტი 6 მარტს პარლამენტში გამოსვლისას ისაუბრებს, თუმცა განარტებების სახით მოგახსენებთ, შეწყალების აქტი პრეზიდენტისთვის წარმოადგენს კონსტიტუციურ უფლებას. სალომე ზურაბიშვილი განსაკუთრებით მნიშვნელოვან საკითხად მიიჩნევს შეწყალების ახალი წესის შემუშავებას და ასევე კომისიის დაკომპლექტების საკითხს. შეწყალება წარმოადგენს ჰუმანურ ქმედებას სახელმწიფოს მხრიდან, რომელსაც ახორციელებს პრეზიდენტი და აძლევს მსჯავრდებულს საშუალებას მოახდინოს რესოციალიზაცია. თუმცა ამავდროულად მიგვაჩნია, რომ შეწყალებისას უნდა იქნას გათვალისწინებული საზოგადოების ინტერესები ანუ რამდენად უსაფრთხოა საზოგადოებისათვის კონკრეტული მსჯავრდებული პირის შეწყალების საკითხი.

ამრიგად, კომისიის დაკომპლქეტებას ვეკიდებით დიდი სიფრთხილით. საჭიროა კომისიის წევრები დაკომპლექტდნენ პროფესიული კადრებით. არ შეიძლება და პრეზიდენტი არ დაუშვებს შეწყალების საკითხი ოდესმე ვინმეს მხრიდან გახდეს ზეწოლის თემა. თუ ამის ნიშნები გამოიკვეთა, ასეთი საკითხი არ განიხილება საერთოდ. პრეზიდენტს მიაჩნია, რომ საჭიროა შეწყალების წესის გამკაცრება და ასევე სამართლებრივ დონეზე უფრო მკაცრ რეგულაციებში მოქცევა“, - განაცხადა მოისწრაფიშვილმა.