ამერიკის შეერთებული შტატების ელჩი კელი დეგნანი გორში იმყოფება

ამერიკის შეერთებული შტატების ელჩი, კელი დეგნანი გორში იმყოფება. ის ქალაქის მერსა და შიდა ქართლის გუბერნატორს შეხვდა. ელჩი წითელი ჯვრის საზოგადოების გორის ფილიალს ეწვია და წითელი ჯვრის საზოგადოების პრეზიდენტ ნათია ლოლაძეს, წითელი ჯვრისა და წითელი ნახევარმთვარის საზოგადოებათა საერთაშორისო ფედერაციის ოფისის ხელმძღვანელს სამხრეთ კავკასიაში, ოლგა ჯუმაევას და ორგანიზაციის მოხალისეებს შეხვდა.

„ჩემთვის პირველი ვიზიტია გორში და ჩემთვის ეს ძალიან დიდი პატივია. მქონდა ძალიან კარგი შეხვედრა გორის მერთან, ასევე შიდა ქართლის გუბერნატორთან. ჩვენ განვიხილეთ სხვადასხვა საკითხები, მათ შორის კოვიდ-19-თან დაკავშირებული სიტუაცია. ასევე ის ძალიან სამწუხარო სიტუაცია, რაც გვაქვს ადმინისტრაციულ გამყოფ ხაზთან. ასევე მე მქონდა საშუალება მენახა საქართველოში „წითელი ჯვრის “ საქმიანობა. ისინი მართლაც ასრულებენ ძალიან მნიშვნელოვან სამუშაოს, ისინი ეხმარებიან ადამიანებს და ხშირად ეს დახმარება ძალიან მნშვნელოვანია ამ ადამიანების სიცოცხლისთვის. USAID და ამერიკის მთავრობა, რა თქმა უნდა მხარს უჭერს „წითელ ჯვარს“ და მხარს უჭერს მათ საქმიანობას ამ მართლაც უპრეცედენტო პანდემიის დროს. გარდა ამისა, მე მქონდა შეხვედრა გორის სამოქალაქო საზოგადოების წარმომადგენლებთან“, - განაცხადა კელი დეგნანმა.

შეხვედრის ფარგლებში კელი დეგნანმა გორის ფილიალის COVID-19-ზე რეაგირების მიზნით გატარებული საქმიანობა განიხილა. USAID-ის ფინანსური მხარდაჭერით წითელ ჯვარს შესაძლებლობა აქვს პანდემიის პირობებში ადგილობრივ თემებს დაეხმაროს.

ვიზიტის ფარგლებში ელჩი წითელი ჯვრისა და წითელი ნახევარმთვარის ორგანიზაციის წარმომადგენლებთან ერთად გორში მცხოვრებ ბენეფიციარებს სასურსათო და ჰიგიენურ ამანათებს გადასცემს.