გოჩა ენუქიძე: ონში მიმდინარეობს და დაგეგმილია მნიშვნელოვანი პროექტები, რომლებიც შეაჩერებს მიგრაციულ პროცესს და მთას სიცოცხლეს დაუბრუნებს

ონისთვის უდიდესი მნიშვნელობა აქვს რაჭა-იმერეთის დამაკავშირებელი საავტომობილო გზის მშენებლობას, რომელიც საგრძნობლად ამცირებს მგზავრობის მანძილსა და დროს. პროექტი სრულიად ახალ პოტენციალს სძენს ჩვენს რეგიონს, რომლის ღირებულებაც 100 მილიონ ლარზე მეტია და მომავალ წელს, 2021 წელს დასრულდება მისი მშენებლობა, - განაცხადა „ქართული ოცნების“ ამბროლაურის, ონის, ცაგერის, მესტიისა და ლენტეხის მაჟორიტარი დეპუტატობის კანდიდატმა, გოჩა ენუქიძიემ ონში სიტყვით გამოსვლისას.

„ონში ამჟამად მიმდინარეობს და დაგეგმილია მნიშვნელოვანი პროექტები, რომლებიც ტურიზმის განვითარებას შეუწყობს ხელს, შექმნის ახალ სამუშაო ადგილებს, შეაჩერებს მიგრაციულ პროცესებს და მთას დაუბრუნებს სიცოცხლეს. ონის მუნიციპალიტეტში ინტენსიურად ხორციელდება გაზიფიცირება და არ შემიძლია, განსაკუთრებული მადლობა არ ვუთხრა კახი კალაძეს - მისი მინისტრობის დროს, ენერგეტიკის მინისტრობის დროს, მისი ინიციატივით, თაოსნობით ჩაეყარა საფუძველი და დღეს უკვე ჩვენ ინტენსიურად ვაწარმოებთ გაზიფიცირებას სოფლებში. მარტო წელს 8 ახალი სოფელი დაემატა და გაზიფიცირდა. მიმდინარეობს რაჭის მხარეთცოდნეობის მუზეუმის მშენებლობა, რომელზეც 6 მლნ ლარამდე დაიხარჯება. სოფელ ღების ისტორიული უბნის აღსადგენად გათვალისწინებულია 2 მილიონ ლარზე მეტი. ბერშევას სახელობის პარკის რეაბილიტაციაა დაგეგმილი, რომელზეც ასევე დაიხარჯება 2.5 მილიონი ლარი. ჩვენი ხელისუფლება წლებია, ახორციელებს მნიშვნელოვან საგრანტო-სამეწარმეო პროგრამებს, რომლის დახმარებითაც რაჭა-ლეჩხუმ-სვანეთის მხარეში შეიქმნა არა ერთი წარმატებული ბიზნეს პრეცედენტი და გაჩნდა მრავალი სამუშაო ადგილი. აქვე, უნდა აღინიშნოს სახელმწიფოს სწრაფი და ეფექტური ქმედებები 29 ივლისის სტიქიის მართვის პროცესში“, - განაცხადა გოჩა ენუქიძემ.

საქართველოში საპარლამენტო არჩევნები 31 ოქტომბერს ჩატარდება.