ყანდაურაში 5 ადამიანის მკვლელობისთვის დაკავებული სასამართლო დარბაზიდან გათავისუფლდა

სოფელ ყანდაურაში 5 ადამიანის მკვლელობის საქმეზე დაკავებული ომარ გამყრელიძე მოსამართლემ სასამართლო დარბაზიდან გაათავისუფლა.

მოსამართლე მამუკა წიკლაურმა დაცვის მხარის შუამდგომლობა დააკმაყოფილა და აღკვეთი ღონისძიება პატიმრობა ნაკლებად მკაცრი სასჯელით შეუცვალა. ომარ გამყრელიძეს 2000 ლარის ოდენობით გირაოს გადახდა დაეკისრა.

რაც შეეხება უმცროს ომარ გამყრელიძეს, ადვოკატმა აღკვეთი ღონისძიების შეცვლა  და გირაოს შეფარდება მოითხოვა. ადვოკატის შუამდგომლობას მოსამართლე არ დაეთანხმა და უმცროსი ომარ გამყრელიძე პატიმრობაში დატოვა.

სხდომა დღეს თელავის რაიონულ სასამართლოში 17:00 საათზე განახლდა. პროცესზე ბრალდების მხარის მოწმეები, საგარეჯოს პოლიციის ორი დეტექტივ- გამომძიებელი დაიკითხა.

დღევანდელ პროცესზე ბრალდების მხარემ, ლევან სამხარაულის სახელობის სასამართლო ექსპერტის დისტანციური დაკითხვა ტექნიკური საშუალების გამოყენებით იმ მიზეზით მოითხოვა, რომ მოწმე სამსახურებრივი მოვალეობის შესრულების გამო პროცესზე დასწრებას ვერ მოახერხებდა. პროკურორის ეს შუამდგომლობა მოსამართლე მამუკა წიკლაურმა დააკმაყოფილა.

პროცესზე ბრალდების მხარის მოწმეები დაიკითხნენ, მათ შორის საგარეჯოს პოლიციის დეტექტივ- გამომძიებლები ირაკლი შაიშმელაშვილი და ლევან ჭიკაძე. სამართალდამცველებმა სხდომაზე სოფელ ყანდაურაში მიმდინარე წლის 3 მაისს მკვლელობის დღე დეტალურად გაიხსენეს და აღნიშნეს, რომ უფროსი ომარ გამყრელიძე პოლიციის წარმომადგენლებს სახლში შესვლის შემთხვევაში მკვლელობით ემუქრებოდა.

შაიშმელაშვილმა განაცხადა, რომ მან დაინახა როგორ ამოიღეს გამომძიებლებმა სახლის ტერიტორიიდან საბრძოლო მასალა, მათ შორის ბრალდებულის ავტომობილის საბარგულიდან. შაიშმელაშვილის თქმით, მტკიცებულებების აღების დროს გამომძიებლებს თან ახლდა სოფელ ყანდაურაში საგარეჯოს მერის წარმომადგენელი.

ეს ჩვენება ეწინააღმდეგება დაცვის მხარის პოზიციას, რომ ნანა ტაველიშვილი ტერიტორიაზე მცირე დრო იყო და მან შემთხვევის ადგილი მალევე დატოვა. ბრალდებულის ადვოკატის გილერი ენდელაძის განცხადებით, მტკიცებულებების დათვალიერების ოქმზე ხელი ტაველიშვილს კანონის დარღვევით მოაწერინეს, რადგან ადგილზე მთელ პროცესს თავად არ დასწრებია.

რაც შეეხება დაცვის მხარეს, ბრალდებულების ადვოკატმა დღევანდელ პროცესზე აღკვეთი ღონისძიების შეცვლის თაობაზე შუამდგომლობა კიდევ ერთხელ მოითხოვა. მოსამართლის განმარტებით, სასამართლო ამ საკითხზე მოგვიანებით იმსჯელებს.

მორიგი სასამართლ პროცესი 19 სექტემბერს, 16:00 საათზე გაიმართება.

ყანდაურაში მკვლელობა 3 მაისს მოხდა. თავდაპირველად შსს-მ გაავრცელა ინფორმაცია, რომ 85 წლის ომარ გამყრელიძემ ცეცხლსასროლი იარაღით შვილი, რძალი და ორი მეზობელი მოკლა, ავადმყოფი მეუღლე კი დაჭრა, რომელიც მოგვიანებით გარდაიცვალა. გამყრელიძე დააკავეს და სასამართლომ აღკვეთის ღონისძიების სახით პატიმრობა შეუფარდა.

მოგვიანებით ამავე საქმეზე ბრალდებულ ომარ გამყრელიძის შვილიშვილიც დააკავეს.

23 ივლისს კი ომარ გამყრელიძეს ბრალი დაუზუსტდა და მას არა მკვლელობას, არამედ მკვლელობაში დახმარებას ედავებოდნენ.